លោក Mauricio Pochettino គ្រូបង្វឹករបស់ក្រុម Tottenham កំពុងតែជំរុញឲ្យក្រុមរបស់លោកប្រើប្រាស់ជ័យជម្នះរបស់ពួកគេនៅលើទឹកដីក្រុម Chelsea កាលពីរដូវកាលមុន ធ្វើជាការលើកទឹកចិត្តសម្រាប់ការបញ្ចប់ការមិនស្គាល់ឈ្នះសោះនៅលើទឹកដី Old Trafford នារាត្រីនេះ។
Spurs នឹងធ្វើដំណើរទៅកាន់ទឹកដីក្រុម Manchester United ជាមួយនឹងកំណត់ត្រាដ៏អន់ ក្រោយពីមិនធ្លាប់បានឈ្នះ ឬរកគ្រាប់បាល់បញ្ចូលទីសូម្បីតែ១គ្រាប់ក្នុងការធ្វើដំណើរទៅប្រកួត៤លើកចុងក្រោយរបស់ពួកគេ។
ក្រុមរបស់លោក Pochettino បានផ្តួល Chelsea ដែលជាគូប្រកួតស្ថិតក្នុងទីក្រុងឡុងដ៍តែមួយរបស់ពួកគេ នៅកីឡដ្ឋាន Stamford Bridge កាលខែមេសា ជាលើកទី១ បើគិតចាប់តាំងពីឆ្នាំ១៩៩០ ក្នុងដំណើរឆ្ពោះទៅកាន់ការឈ្នះកោអីទៅលេងក្នុងក្របខ័ណ្ឌ Champions League។
គ្រូបង្វឹកសញ្ជាតិអាហ្សង់ទីនរូបនេះ ចង់ឲ្យក្រុមរបស់លោកប្រើប្រាស់បទពិសោធនោះដើម្បីទទួលបានលទ្ធផលមួយនៅថ្ងៃចន្ទនេះ បើទោះបីការត្រៀមលក្ខណៈផ្សេងៗសម្រាប់ការប្រកួតនេះត្រូវបានរំខានដោយការចោទប្រកាន់ពីបទបើកបរក្រោមឥទ្ធិពលនៃគ្រឿងស្រវឹងទៅលើអ្នកចាំទី Hugo Lloris របស់ពួកគេក៏ដោយ។
លោក Pochettino ដែលមិនបាននិយាយពីស្ថានភាពរបស់ Lloris ក្នុងសន្និសីទសារព័ត៌មានកាលពីថ្ងៃសុក្រ បាននិយាយទាក់ទងនឹងទម្រង់លេងរបស់ពួកគេនាកីឡដ្ឋាន Old Trafford ថា៖ «នោះមិនមែនជាការដឹងដោយប្រើញៀនឡើយ ប៉ុន្តែ វាជាការពិត។ យើងបានចាញ់៤ប្រកួត យើងមិនបានស៊ុតបាល់បញ្ចូលទីសោះ ហើយយើងមិនដណ្តើមបានសូម្បីតែ១ពិន្ទុ»។
គ្រូបង្វឹករូបនេះបានបន្ថែមទៀតថា៖ «ប៉ុន្តែ Chelsea កាលពីរដូវកាលមុន គឺជាគំរូដ៏ល្អមួយ។ ក្រោយពីរយៈពេល២៨ឆ្នាំ យើងបានទទួលជ័យជម្នះ។ មានចំណុចអវិជ្ជមានជាច្រើន ប៉ុន្តែ អ្នកត្រូវតែជឿជាក់ ហើយខ្ញុំជឿជាក់ថា យើងអាចទទួលជ័យជម្នះ»។ ការប្រកួតនេះនឹងចាប់ផ្តើមនៅម៉ោង២ទៀបភ្លឺ៕
