បរGabriel Magalhãesទេស៖ ខ្សែការពារកណ្តាល Gabriel Magalhães របស់ក្លិប Lille បានយល់ព្រមចូលរួមជាមួយនឹងក្លិប Arsenal ហើយនិងធ្វើដំណើរទៅកាន់ទីក្រុងឡុងដ៍ នៅថ្ងៃចន្ទនេះ ដើម្បីបំពេញការផ្ទេរមួយដែលមានតម្លៃខ្លួនដល់ទៅ៣០លានអឺរ៉ូ (ស្មើនឹង៣៥,៤លានដុល្លារអាមេរិក)។
ក្លិប Arsenal ពោរពេញដោយការជឿជាក់ក្នុងការនាំយក Gabriel ក្រោយពីក្លិបរបស់ក្របខ័ណ្ឌ Ligue 1 បានទទួលយកសំណើដេញថ្លៃរបស់ខ្លួន កាលពីសប្តាហ៍មុន។ ក្លិបជាច្រើនផ្សេងទៀត ក៏ចង់បានខ្សែការពារដ៏ឆ្នើមរូបនេះផងដែរ ខណៈដែលក្លិប Napoli កំពុងតែបង្ហាញពីការចាប់អារម្មណ៍របស់ខ្លួន ស្របពេលដែលក្លិប Manchester United និង Manchester City បានឃ្លាំមើលស្ថានភាពនៃការផ្ទេរនេះ។ ប៉ុន្តែ ការពិភាក្សានានាកាលពីថ្ងៃសៅរ៍ បានឈានដល់ចំណុចកាត់សេចក្តី ហើយ Gabriel នឹងយល់ព្រមចុះកិច្ចសន្យារយៈពេល៥ឆ្នាំ នៅដើមសប្តាហ៍នេះ។ នេះគឺជាការទិញចូលកីឡាករថ្មីជាលើកទី២របស់ក្លិប Arsenal ពីក្លិប Lilleក្នុងរយៈពេល២រដូវកាលជាប់ៗគ្នា ដោយកាលពីឆ្នាំមុន ក្លិបកាំភ្លើងធំមួយនេះ បាននាំយកខ្សែប្រយុទ្ធ Nicolas Pépé ក្នុងតម្លៃខ្លួន៧២លានផោន (ស្មើនឹង៩៤លានដុល្លារអាមេរិក)។
ប៉ុន្តែ ទោះបីជាយ៉ាងណា Gabriel គឺជាខ្សែការពារវ័យ២២ឆ្នាំ ដែលបានចូលរួមជាមួយនឹងក្លិប Lille ពីក្លិបប្រេស៊ីល Avai ក្នុងឆ្នាំ២០១៧។ ក្រោយពីចំណាយពេលក្នុងនាមជាកីឡាករកម្ចីនៅក្លិប Troyes និង Dinamo Zagreb រូបគេបានជួបរដូវកាលដ៏រីករាយក្នុងឆ្នាំ២០១៩-២០២០ បើទោះបីត្រូវបានលុបចោលមុនបញ្ចប់ការប្រកួត ដោយសារតែវីរុសកូវីដ-១៩ ក៏ដោយ៕
ប្រភពព័ត៌មាន៖ The Guardian
