បរទេស៖ ក្លិប Everton បានចុះហត្ថលេខាផ្ទេរយកជាផ្លូវការណ៏ខ្សែបម្រើសញ្ជាតិប្រេស៊ីល Allan ពីក្លិប Napoli ក្នុងកិច្ច​សន្យា​រយៈពេល ៣ ឆ្នាំក្នុងតម្លៃខ្លួនក្រៅផ្លូវការណ៏ដែលគេជឿជាក់មានតម្លៃ ២១,៧ លានផោន​។ Allan ជាសមាជិកដំបូងគេសម្រាប់គ្រូបង្វឹកលោក Carlo Ancelotti ដែលមានឪកាសចុះហត្ថលេខា នាំយកអតីតកីឡាកររបស់ខ្លួនមករួមការងារសាជាថ្មី។

កីឡាករវ័យ ២៩ ឆ្នាំរូបនេះបាននិយាយថារូបគេពិតជារីករាយដែលបានសម្រេចការផ្ទេរ​មកកាន់​ទឹកដី ​Goodision Park ខណៈក្រុមក៏កំពុងតែខិតយ៉ាងកៀកក្នុងការចុះហត្ថលេខានាំយកកីឡាករ Abdoulaye Doucoure របស់ក្លិប Watford និង James Rodriguez មកពីក្លិប Real Madrid ផងដែរ។ គួរបញ្ជាក់ថា Allan លេងបាន ៦១ ប្រកួតក្រោមការដឹកនាំរបស់លោក Ancelotti កំលុង​ពេល​លេងអោយក្លឹប Napoli បានបញ្ជាក់បន្ថែមថា៖ Everton ជាក្លឹបមួយដែលមានប្រវត្ដិសាស្ដ្រដ៏សំបូរ​បែប​នៅ Premier League មានមហិច្ឆិតាពិតប្រាកដហើយបន្ទាប់មកគឺបុគ្គលឆ្នើមលោក Ancelotti ដែលជាហេតុធ្វើអោយខ្ញុំសម្រេចចិត្តផ្លាស់មកលេងនៅទីនេះ ។

អតីតកីឡាករ Udinese ដែលធ្លាប់បានបង្ហាញខ្លួនដល់ទៅជាង ២០០ ប្រកួតសំរាប់ Napoli និង​មានឪកាសបានបង្ហាញខ្លួន ចាប់ដៃគូជាមួយមិត្តរួមជាតិប្រេស៊ីលគឺខ្សែប្រយុទ្ធ Richarlison ដែលជា​សមាជិកជ័យលាភី Copa America ឆ្នាំ ២០១៩៕

ប្រភពព័ត៍មាន៖ BBC