បរទេស៖ Southampton បានចុះកិច្ចសន្យាផ្ទេរយកអតីតកីឡាករយុវជនថ្នាលគឺខ្សែប្រយុទ្ធស្លាប Theo Walcott ក្នុងលក្ខខណ្ឌខ្ចីជើងពេញមួយរដូវកាលពីក្លឹប Everton។ Walcott ធ្លាប់បង្ហាញខ្លួនអោយក្រុមតោកំណាចអង់គ្លេសចំនួន ៤៧ លើករូបនេះបាន វិលត្រលប់ទៅក្លឹបដែលខ្លួនធ្លាប់ចាប់ផ្តើមអាជីពដំបូងដែលមានមូលដ្ឋាននៅឆ្នេរសមុទ្រ ភាគខាងត្បូងចក្រភពអង់គ្លេសមុនពេលផ្លាស់ទៅ Arsenal នៅឆ្នាំ ២០០៦។
នៅខែមករា ឆ្នាំ ២០១៨ Walcott បានផ្ទេរទៅ Everton នៅក្នុងកិច្ចព្រមព្រៀងតម្លៃ ២០ លានផោន ក្រោយចំណាយពេលជាមួយកាំភ្លើងធំ១២ឆ្នាំ។ កីឡាករវ័យ ៣១ ឆ្នាំរូបនេះបានបញ្ជាក់ក្រោយចូលរួមជាផ្លូវការណ៏ជាមួយអតីតក្លឹប Southampton ក្រោយចាកចេញ១៥ឆ្នាំថាៈ ខ្ញុំមានឱកាសតិចតួចដើម្បីផ្លាស់ទៅ ក្លិបផ្សេងទៀតប៉ុន្តែភ្លាមៗនៅពេលដែលពួកគេ (Southampton) បានទាក់ទងមកធ្វើឱ្យខ្ញុំចាប់អារម្មណ៏និងសម្រេចចិត្តដោយមិនគិតយូរដើម្បីចូលរួមជាមួយពួកគេ។
Walcott ធ្លាប់បានបង្ហាញខ្លួនជាលើកដំបូងនៅ Southampton ក្នុងខែសីហាឆ្នាំ ២០០៥ ពេលមានអាយុ ១៦ ឆ្នាំនិង ១៤៣ ថ្ងៃ និងជាប់ជាកីឡាករវ័យក្មេងបំផុតរបស់ក្លឹប ព្រមទាំងបានជួយក្លឹបឈានដល់វគ្គផ្តាច់ព្រ័ត្រ FA Youth Cup ឆ្នាំ ២០០៥នាពេលនោះផងដែរ៕
ប្រភពព័ត៍មាន៖ BBC
