បរទេស៖ លោក Frank Lampard អ្នកចាត់ការទូទៅរបស់ក្រុម Chelsea រំពឹងទុកថា កីឡាកររបស់លោក នឹងស្តារមុខមាត់ត្រឡប់មកវិញ ក្រោយពីការរងបរាជ័យក្នុងលទ្ធផល ៣-១ ក្រោមស្នាដៃក្រុមស្ថិតក្នុងទីក្រុងឡុងដ៍ដូចគ្នា Arsenal បានធ្វើឲ្យពួកគេធ្លាក់ទៅឈរក្នុងចំណាត់ថ្នាក់លេខ៧ នៅលើតារាងក្របខ័ណ្ឌ Premier League។
ការរងបរាជ័យនៅកីឡដ្ឋាន Emirates កាលពីថ្ងៃសៅរ៍ គឺជាការរងបរាជ័យជាលើកទី៣ ក្នុងចំណោមការប្រកួត៤លើក ក្រោយពីការជួបការខកចិត្តដូចគ្នានេះ ពេលប្រកួតជាមួយនឹងក្រុម Everton និង Wolverhampton Wanderers។ លោក Lampard បាននិយាយថា កីឡាកររបស់លោក បានបង្ហាញពីកម្រិតលេងដ៏អន់បំផុតរបស់ពួកគេនៅរដូវកាលនេះនៅតង់ទី១ ពេលប្រកួតជាមួយនឹងក្រុម Arsenal ខណៈដែលពួកគេបានបណ្តោយឲ្យខ្សែប្រយុទ្ធ Alexandre Lacazette និងខ្សែបម្រើ Granit Xhaka ស៊ុតបាល់បញ្ចូលទី នៅមុនពេល Bukayo Saka បានបន្ថែមគ្រាប់បាល់ទី៣នៅតង់ទី២។ នៅមុនពេលការប្រកួតជាមួយនឹងក្រុម Aston Villa លើទឹកដីខ្លួនឯងនៅរាត្រីនេះ លោក Lampard បានឲ្យដឹងថា៖ «ខ្ញុំគិតថា យើងធ្វើឲ្យមានកំហុសយ៉ាងពិតប្រាកដ ហើយយើងជួបបញ្ហាជាច្រើនក្នុងការប្រកួតនោះ។
របៀបដែលយើងបានលេងក្នុងតង់ទី១ នៅលើទីលាន មិនត្រឹមត្រូវឡើយ»។ លោក Lampard រំពឹងទុកថា នឹងជួបការប្រកួតដ៏ស្វិតស្វាញជាមួយនឹងក្រុម Aston Villa ដែលបានឡើងឈរលេខ៦ ក្រោយពីបានយកឈ្នះលើក្រុម Crystal Palace ក្នុងលទ្ធផល ៣-០ បើទោះបីលេងជិតពាក់កណ្តាលនៃការប្រកួតជាមួយនឹងសមាជិកត្រឹមតែ១០នាក់ក៏ដោយ៕
ប្រភពព័ត៌មាន៖ Channel News Asia
