បរទេស៖ Aston Villa កំពុងតែរៀបចំប្រើប្រាស់ក្រុមមួយដែលប្រជុំដោយកីឡាករវ័យក្មេងក្នុងការប្រកួតដណ្តើមពាន FA Cup ជុំទី៣ ជាមួយនឹងក្រុម Liverpool នៅលើទឹកដីខ្លួនឯង ក្រោយពីការផ្ទុះករណីឆ្លងវីរុសកូវីដ-១៩នៅក្នុងក្លិបនេះ។
សេចក្តីសម្រេចចុងក្រោយថា តើការប្រកួតនេះ នឹងប្រព្រឹត្តទៅជាធម្មតា នឹងត្រូវធ្វើឡើនៅត្រឹមថ្ងៃសុក្រនេះ។ លោក Dean Smith អ្នកចាត់ការទូទៅរបស់ក្រុម Aston Villa បុគ្គលិកគ្រូបង្វឹករបស់លោក និងសមាជិកផ្សេងទៀតក្នុងក្រុមឈុតធំ នឹងមិនអាចចូលរួមក្នុងការប្រកួតនេះបានឡើយ ក្រោយពីការផ្ទុះការឆ្លង បានបង្ខំឲ្យបិទទីលានហ្វឹកហាត់ Bodymoor Heath របស់ក្លិប កាលពីថ្ងៃព្រហស្បតិ៍។ ក្លិប Aston Villa កំពុងតែពិភាក្សាជាមួយនឹងសហព័ន្ធកីឡាបាល់ទាត់អង់គ្លេស និងចង់បំពេញការប្រកួតនេះនៅម៉ោង 19:45 GMT ប៉ុន្តែ ការសម្រេចចិត្តចុងក្រោយ ទៅលើថា ការប្រកួតនេះ នឹងត្រូវរៀបចំឡើងឬ អត់ នៅតែនៅទ្រឹងនៅឡើយ ដោយរង់ចាំលទ្ធផលនៃការធ្វើតេស្តបន្ថែមទៀតសិនលើកីឡាករវ័យក្មេង ដែលបច្ចុប្បន្នត្រូវបានរំពឹទុកថា នឹងត្រូវរើសឲ្យចូលប្រកួត។
ប៉ុន្តែ ការប្រកួតនេះបានស្ថិតក្នុងភាពមិនច្បាស់ នៅពេលដែលក្លិប Aston Villa បានប្រកាសពីការបិទទីលានហ្វឹកហាត់ ក្រោយពីសមាជិក និងបុគ្គលិកជាច្រើនក្នុងក្រុមឈុតធំ បានទទួលលទ្ធផលជាវិជ្ជមានលើវីរុសកូរ៉ូណា បន្ទាប់ពីការធ្វើតេស្តកាលពីថ្ងៃចន្ទ៕
ប្រភពព័ត៌មាន៖ Channel News Asia
