អតីតខ្សែប្រយុទ្ធជំរើសអាល្លឺម៉ង់ Lukas Podolski បានមកដល់កីឡដ្ឋានរបស់ក្លិបម៉ាឡេស៊ី Johor DarulTa’zim (JDT) ចំពេលមានពាក្យចចាមអារាមអំពីការផ្ទេរ ទៅកាន់ក្រុមជើងឯកលីគកំពូលម៉ាឡេស៊ី។
ខ្សែប្រយុទ្ធវ័យ ៣៤ឆ្នាំរូបនេះត្រូវបានគេមើលឃើញថា បានទៅដល់ពហុកីឡដ្ឋាន Sultan Ibrahim Larkin ថ្មីរបស់ JDT ក៏ដូចជាកន្លែងហ្វឹកហាត់របស់ពួកគេផងដែរ ខណៈដែលគាត់កំពុងពិភាក្សាជាមួយម្ចាស់ក្លិប Johor ព្រះអង្គម្ចាស់ Tunku Ismail Idris ផងដែរ។
នគេរាយការណ៍ថា JDT ខិតជិតលើការចុះហត្ថលេខានាំយក អតីតម្ចាស់ជ័យលាភជើងឯកបាល់ទាត់ពិភពលោក ជាមួយក្រុមជំរើសជាតិអាល្លឺម៉ង់រូបនេះ ហើយពាក្យចចាមអារ៉ាមកាន់តែខ្លាំងនៅពេលដែល Podolski បានសរសេរថា “ជួបគ្នាឆាប់ៗ” លើការបង្ហោះនៅបណ្ដាញសង្គម Instagram របស់ JDT។
មិនយូរប៉ុន្មានព្រះអង្គម្ចាស់ Johor បញ្ជាក់ថា អតីតខ្សែប្រយុទ្ធក្រុម Bayern Munich និង Arsenal ពិតជាចាប់អារម្មណ៍ចង់ចូលរួម ជាមួយក្រុមជើងឯកលីគកំពូលម៉ាឡេស៊ី និងបានលើកឡើងពីដំណើរទស្សនកិច្ចរបស់ Podolski នៅ Johor Bahru ផងដែរ។
ទោះយ៉ាងណាការចុះហត្ថលេខានឹងមានភាពស្មុគស្មាញ ដោយសារ JDT មានកីឡាករបរទេសចំនួន ៥នាក់ទៅហើយសម្រាប់រដូវកាលខាងមុខ ដែលនេះជាចំនួនអតិបរមាដែលពួកគេអាចបំពេញបានតាមគោលការ ដែលបានកំណត់របស់លីគកំពូលម៉ាឡេស៊ី៕
