អ្នកចាំទី Gianluigi Buffon និងខ្សែការពារ Giorgio Chiellini បានបន្តកិច្ចសន្យាជាមួយនឹងក្លឹប Juventus របស់ពួកគេរហូតដល់ឆ្នាំ២០២១។ នេះបើយោងទៅតាមការប្រកាសរបស់ក្លឹបដែលកំពុងតែនាំមុខលើតារាងក្របខ័ណ្ឌ Serie A មួយនេះ កាលពីថ្ងៃចន្ទ។
កិច្ចសន្យាថ្មីទាំង២នេះ ដែលត្រូវបានប្រកាសដោយក្លឹប Juventus នោះ មានន័យថា អតីតប្រធានក្រុមនៃក្រុមជម្រើសជាតិអ៊ីតាលី Buffon នឹងបន្តនៅជាមួយនឹងក្លឹបសេះបង្កង់មួយនេះ លើសពីវ័យ៤៣ឆ្នាំរបស់គេ។
ក្លឹប Juventus បានឲ្យដឹងក្នុងសេចក្តីថ្លែងការណ៍មួយថា៖ «Bianconeri (Juventus) តាំងពីចាប់ផ្តើម និងបន្តជារៀងរហូត។ យើងសូមប្រកាសថា វាពិតជាចាំបាច់ណាស់ក្នុងការបញ្ជាក់ថា នៅថ្ងៃនេះ កិច្ចសន្យារបស់ពួកគេបន្តជាផ្លូវការ សម្រាប់រយៈពេល១ឆ្នាំទៀតគឺឆ្នាំ២០២១»។ Buffon បានវិលទៅកាន់ក្លឹប Juventus វិញ កាលពីរដូវក្តៅមុន ក្រោយពីបានជួបរដូវកាលយ៉ាងខកចិត្តនៅឯក្លិប Paris Saint-Germain និងជាកីឡាករដែលបានបង្ហាញខ្លួនក្នុងក្របខ័ណ្ឌ Serie A ច្រើនជាងគេរបស់ក្លឹបនេះ ក្រោយពីបានបង្ហាញខ្លួន៤៧៩លើកក្នុងការប្រកួតលីក បើគិតចាប់តាំងពីបានចូលរួមឆ្នាំ២០០១។ ពេលនៅជាមួយនឹងកឹ្លប Juventus រូបគេបានឈ្នះពានលីកនេះ៩លើក ប៉ុន្តែ ការឈ្នះពានអឺរ៉ុបតែ១លើករបស់គេ បានកើតឡើង នៅពេលដែលរូបគេបានឈ្នះពាន UEFA Cup ជាមួយនឹងក្លិប Parma ក្នុងឆ្នាំ១៩៩៩៕
ប្រភពព័ត៌មាន៖ Channel News Asia