ក្រុមបាល់ទាត់ខេត្តសៀមរាប និងខេត្តព្រៃវែង នឹងត្រូវបើកកីឡដ្ឋានរបស់ខ្លួន ស្វាគមន៍ក្រុមខេត្តកណ្តាល និងខេត្តកោះកុង ដើម្បីប្រជែងគ្នារកការឈ្នះ សម្រាប់ការប្រកួតជើងទី១វគ្គ៨ក្រុមចុងក្រោយ ពានរង្វាន់សម្តេច ហ៊ុន សែន លើកទី១៤ (ថ្នាក់ខេត្ត) ឆ្នាំ២០២០ នៅរសៀលម៉ោង៣ ថ្ងៃអង្គារនេះ។
ការវិលមកជួបគ្នា រវាងក្រុមខេត្តលេខ១ប្រចាំពូលB ខេត្តសៀមរាប និងក្រុមខេត្តកណ្តាល នៅកីឡដ្ឋានខេត្តសៀមរាប នារសៀលម៉ោង៣ ថ្ងៃអង្គារនេះ វានឹងក្លាយជាការប្រកួត ដែលមានភាពស្វិតស្វាញខ្លាំង ព្រោះក្រុមទាំង២នេះ សុទ្ធតែបានអះអាង ពីការត្រៀមខ្លួនបានល្អដូចគ្នា។
យ៉ាងណាក៏ដោយ ខេត្តសៀមរាប ដែលធ្វើបានល្អនៅវគ្គជម្រុះតាមពូល ដោយឈ្នះ៣ និងចាញ់១ប្រកួតនោះ អាចនឹងមានប្រៀបលើក្រុមខេត្តកណ្តាលបន្តិច ក្នុងនាមជាម្ចាស់ផ្ទះ ប៉ុន្តែខេត្តកណ្តាល ដែលទទួលបានលេខ២ល្អប្រចាំពូលD ក៏ធ្វើបានល្អផងដែរ ដោយឈ្នះ១ និងស្មើ៣ គឺមិនទាន់ស្គាល់ការចាញ់នោះទេ។
ដោយឡែក ក្រុមលេខ១ប្រចាំC ខេត្តព្រៃវែង ក៏អាចមានប្រៀបក្នុងនាមជាម្ចាស់ផ្ទះផងដែរ ហើយបន្ថែមលើនេះ តាមរយៈការប្រកួតជម្រុះតាមពូលកន្លងមកនេះ ខេត្តព្រៃវែង ក៏ធ្វើបានល្អផងដែរ ដោយពួកគេបានឈ្នះ២ និងស្មើ២ប្រកួត ខណៈក្រុមខេត្តកោះកុង ដែលបានឡើងមកដល់វគ្គនេះ ក្នុងនាមជាក្រុមលេខ២ប្រចាំពូលEនោះ បានឈ្នះ២ ស្មើ១ និងចាញ់១ដង។
យ៉ាងណាក៏ដោយ លទ្ធផលពិតប្រាកដទៅជាយ៉ាងណានោះ គ្មានអ្នកណាអាចប៉ានស្មានត្រូវនោះឡើយ ព្រោះនៅមុនការឡើងមកជួបគ្នា នៅក្នុងវគ្គ៨ក្រុមចុងក្រោយនេះ ទាំងក្រុមខេត្តព្រៃវែង និងខេត្តកោះកុង សុទ្ធតែបានត្រៀមខ្លួនរួចរាល់ ហើយក៏បានសិក្សាពីចំណុចខ្សោយ និងចំណុចខ្លាំងគ្នាទៅវិញទៅមកហើយដែរ ហេតុនេះឱកាសរកបានគ្រាប់បាល់ អាចនឹងកើតមានដូចគ្នា៕