រដ្ឋលេខាធិការក្រសួងអប់រំ យុវជន និងកីឡា លោក ស សុខា បានប្រតិកម្មភ្លាមៗទៅនឹងការលើកឡើងរបស់អ្នកនិយមកលេងហ្វេសប៊ុកមួយចំនួន ដែលបានវាយប្រហាររូបលោកខុសពីការពិត ពាក់ព័ន្ធទៅនឹងក្លិបបាល់ទាត់វិសាខា ដោយលោកបានបញ្ជាក់ថា លោកពុំដែលយកតួនាទី បុណ្យស័ក្តិរបស់ខ្លួន ទៅកាងនឹងរឿងអ្វីមួយឡើយ ជាពិសេសពាក់ព័ន្ធនឹងក្លិបវិសាខា បើទោះបីជារូបលោកជាស្ថាបនិកក្លិបនេះ។
បើទោះបីជា លោក ស សុខា មិនបានបង្ហាញមុខ អ្នកដែលបានរិះគន់លោកឲ្យចំៗឈ្មោះ ប៉ុន្តែលោកបានសរសេរបង្ហោះនៅលើហ្វេសប៊ុកផ្លូវការរបស់ខ្លួន កាលពីថ្ងៃចន្ទថា៖«ថ្មីៗនេះ ដោយពិនិត្យឃើញថា មានបងប្អូនមួយចំនួនតូច ដែលចូលចិត្តបញ្ចេញអារម្មណ៍របស់ខ្លួន តាមប្រព័ន្ធផ្សព្វផ្សាយសង្គម (Facebook) ជុំវិញក្លិបវិសាខា ដោយធ្វើការទាញភ្ជាប់រូបខ្ញុំ ទៅនឹងការបញ្ចេញអារម្មណ៍នោះ បែបវាយប្រហារខុសពីការពិតមកលើរូបខ្ញុំ ទាំងខ្ញុំមិនបានដឹង ឬពាក់ព័ន្ធទាល់តែសោះ បណ្តាលឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់ខ្ញុំជាខ្លាំង»។
កូនប្រុសរបស់លោកឧបនាយករដ្ឋមន្រ្តី ស ខេង រូបនេះ បានបន្តថា៖«ខ្ញុំសូមជម្រាបជូនពុកម៉ែ បងប្អូនសាធារណជនទាំងអស់ មេត្តាជ្រាបថា រូបខ្ញុំពុំដែលយកតួនាទីបុណ្យស័ក្តិរបស់ខ្លួន ទៅកាងនឹងរឿងអ្វីមួយឡើយ ជាពិសេសពាក់ព័ន្ធនឹងក្លិបវិសាខា បើទោះបីជារូបខ្ញុំជាស្ថាបនិកក្លិបនេះ ហើយបច្ចុប្បន្ន ភរិយារបស់ខ្ញុំ ជាប្រធានក្លិបក៏ដោយចុះ។ បង្កើតក្លិបនេះ ពុំបានគិតពីផលប្រយោជន៍នោះទេ ដោយសារស្រឡាញ់ និងចង់ចូលរួមអភិវឌ្ឍវិស័យកីឡាតែប៉ុណ្ណោះ»។
គេនៅមិនទាន់ដឹងថា តើការប្រតិកម្មរបស់លោក ស សុខា សំដៅទៅលើមនុស្សប៉ុន្មាននាក់ ហើយពាក់ព័ន្ធទៅនឹងរឿងអ្វីឲ្យប្រាកដនៅឡើយទេ ប៉ុន្តែនៅក្នុងការសរសេរបង្ហោះតបវិញនោះ លោក ស សុខា ក៏បានភ្ជាប់ជាមួយលិខិតសូមទោសរបស់លោក សូត្រ សុគន្ធផា ដែលបានសូមទោសចំពោះការប្រើពាក្យសម្តីខុសឆ្គង និងមិនសមរម្យ ចំពោះរូបលោក ផងដែរ ហើយបើតាមប្រភពក្រៅផ្លូវការ បានឲ្យដឹងថា ការវាយប្រហាររបស់អ្នកលេងហ្វេសប៊ុកមួយចំនួនទៅលើលោក ស សុខា បានកើតមានឡើយ នៅពេលក្រុមវិសាខា ប្រកួតស្មើគ្នា ២-២ ជាមួយក្រុមភ្នំពេញក្រោន កាលពីថ្ងៃអាទិត្យ កន្លងមកនេះ។
យ៉ាងណាក៏ដោយ លោក ស សុខា បានបញ្ជាក់នៅក្នុងសារនោះថា៖«ជាថ្មីម្តងទៀត ខ្ញុំសូមអំពាវនាវដល់បងប្អូនទាំងអស់ សូមមេត្តាកុំប្រញាប់ប្រញាល់ ក្នុងការបញ្ចេញអារម្មណ៍របស់ខ្លួន ដោយទាញភ្ជាប់រូបខ្ញុំទៅនឹងរឿងនេះរឿងនោះ ទាំងរូបខ្ញុំមិន បានដឹង ឬមិនពាក់ព័ន្ធសោះនោះ ព្រោះវាធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូររបស់ខ្ញុំ ជាពិសេសដែលអាចធ្វើឱ្យខ្លួនឯងប្រឈមទៅនឹងបញ្ហាផ្លូវច្បាប់ ជាប់ទោសទណ្ឌផ្សេងៗទៀតផង។ សូមកុំគិតថា ធ្វើខុសហើយសុំទោសរួចខ្លួន ក៏ចេះតែធ្វើទៅនោះអី!»៕