រដ្ឋមន្រ្តីក្រសួងអប់រំ យុវជន និងកីឡា លោកបណ្ឌិតសភាចារ្យ ហង់ជួន ណារ៉ុន នៅថ្ងៃអង្គារនេះ បានចេញសេចក្តីជូនដំណឹង ស្តីពីការអនុញ្ញាតឲ្យដំណើរការឡើងវិញនូវសកម្មភាពហាត់ប្រាណ និងលេងកីឡា តាមទីធ្លាសាធារណៈ នៅតាមរាជធានី ខេត្ត និងក្នុងពហុកីឡដ្ឋានជាតិអូឡាំពិក។
ការបើកឲ្យមានសកម្មភាពហាត់ប្រាណ និងលេងកីឡា តាមទីធ្លាសារណៈនេះ ត្រូវបានក្រសួងអប់រំ យុវជន និងកីឡា បញ្ជាក់នៅក្នុងសេចក្តីជូនដំណឹងនេះថា ដោយសារសព្វថ្ងៃនេះ ការទប់ស្កាត់ការរីករាលដាលនៃជំងឺកូវីដ១៩ នៅក្នុងប្រទេសកម្ពុជា មានសភាពល្អប្រសើរ និងអាចគ្រប់គ្រងបាន បើទោះបីជា ករណីនាំចូលនៃជំងឺកូវីដ១៩ មកកាន់ប្រទេសកម្ពុជា មានចំនួនកើនឡើងគួរឲ្យកត់សម្គាល់ នាពេលច្ចុប្បន្ននេះក្តី។
«ដោយសារបច្ចុប្បន្ននេះ ការទប់ស្កាត់ការរីករាលដាលនៃជំងឺវីដ១៩ នៅក្នុងប្រទេសកម្ពុជាមានសភាពល្អប្រសើរ និងអាចគ្រប់គ្រងបាន និងដើម្បីលើកកម្ពស់ការថែទាំសុខភាព ផ្លូវកាយ និងផ្លូវចិត្តរបស់បងប្អូនប្រជាពលរដ្ឋ តាមរយៈការហាត់ប្រាណ និងការលេងកីឡា ក្រសួងអប់រំ យុវជន និង កីឡា ទទួលបានការអនុញ្ញាតដ៏ខ្ពង់ខ្ពស់ពីសម្តេចតេជោនាយករដ្ឋមន្ត្រី ដើម្បីដំណើរការឡើងវិញ នូវសកម្មភាពហាត់ប្រាណ និងការលេងកីឡាតាមទីធ្លាសាធារណៈនៅតាមរាជធានី ខេត្ត និងក្នុងបវិវេណពហុកីឡដ្ឋានជាតិអូឡាំពិក លើកលែងតែសកម្មភាពហាត់ប្រាណតាមក្លឹបកីឡា ដែលប្រើប្រាស់សម្ភារៈរួមគ្នា»។
យ៉ាងណាក៏ដោយ នៅក្នុងការអនុញ្ញាតឲ្យដំណើរការឡើងវិញនេះ ក្រសួង ស្នើឲ្យទីកន្លែងហាត់ប្រាណ និងលេងកីឡាទាំងអស់ ត្រូវបន្តគោរពតាមវិធានសុវត្ថិភាពសុខភាពរបស់ក្រសួងសុខាភិបាល និងអង្គការសុខភាពពិភពលោក ចំនួន៤ចំណុច ដែលបានកំណត់នៅក្នុងសេចក្តីជូនដំណឹងនេះ ឲ្យបានត្រឹមត្រូវ និងម៉ឺងម៉ាត់បំផុត៕