បរទេស៖ អ្នកចាំទីជើងចាស់ Claudio Bravo បានចាកចេញពីទីក្រុង Manchester បន្ទាប់ពីកិច្ចសន្យារបស់គាត់ជាមួយក្រុមជើងឯករងក្របខ័ណ្ឌ Premier League ផុតសុពលភាព។ កីឡាករសញ្ជាតិឈីលីវ័យ ៣៧ ឆ្នាំរូបនេះបានចុះកុងត្រារយៈពេល ៤ ឆ្នាំជាមួយតម្លៃខ្លួនផ្ទេរប្រមាណ ១៥,៤ លានផោនពីក្លិបយក្សអេស្ប៉ាញ Barcelona នៅឆ្នាំ ២០១៦ដើម្បីជំនួសអតិតអ្នកចាំទី Joe Hart ។
ទោះយ៉ាងណា Bravo បង្ហាញទម្រង់លេងបានមិនបានលទ្ធផលល្អនៅរដូវកាលដំបូង(២០១៦-២០១៧) ស្របពេលលោក Pep Guardiola ក៏មិនបានឈ្នះពានសម្រាប់រដូវកាលដំបូងរបស់លោកដូចគ្នាផងដែរ។ បន្ទាប់មកទៀតក្រោយការមកដល់របស់អ្នកចាំទីប្រេស៊ីល Ederson ក្នុងខែមិថុនាឆ្នាំ ២០១៧ Bravo បានត្រឹមជាប់ជាកីឡាករដៃទី២ និងបង្ហាញខ្លួនពិតប្រាកដសម្រាប់ការប្រកួត League Cup និង FA Cup ប៉ុណ្ណោះប្រសិនជា Ederson មិនមានបញ្ហារបួស។
សរុបមក៤រដូវកាលកន្លងមកនេះ Bravo បង្ហាញខ្លួនគ្រប់ក្របខណ្ឌប្រកួតអោយក្រុមមេឃខៀវ Man City សរុប បាន៦១ ដង (នៅក្របខណ្ឌ Premier League ៧ដង) និងការពារមិនអោយគូប្រកួតស៊ុតបញ្ចូលទី Cleansheet បាន ២០ ប្រកួត៕
ប្រភពព័ត៍មាន៖ BBC
