បរទេស៖ អតីតតារាកីឡាបាល់ទាត់កម្រិតពិភពលោក Ronaldinho បានចាកចេញពីប្រទេសប៉ារ៉ាហ្គាយ កាលពីថ្ងៃអង្គារ ពោលគឺត្រឹមតែរយៈពេលប៉ុន្មានម៉ោងប៉ុណ្ណោះ ក្រោយពីចៅក្រមបានដោះលែងរូបគេឲ្យរួចផុតពីការឃាត់ខ្លួនរយៈពេល៥ខែ ជុំវិញការប្រើប្រាស់លិខិតឆ្លងដែនក្លែងក្លាយ។
Ronaldinho បានចាកចេញពីសណ្ឋាគារ ដែលរូបគេបានស្នាក់នៅ ចាប់តាំងពីខែមេសា នៅក្នុងរដ្ឋធានី Asuncion ដើម្បីធ្វើដំណើរទៅកាន់ទីក្រុង Rio de Janeiro តាមរយៈយន្តហោះឯកជន ជាមួយនឹងបងប្រុសរបស់គេ Roberto។ នេះបើយោងទៅតាមការបញ្ជាក់របស់ក្រុមអាជ្ញាធរប៉ារ៉ាហ្គាយ។ ក្នុងរយៈពេលប៉ុន្មានម៉ោងមុននេះនៅលើគណនី Instagram របស់គេ អតីតតារាឆ្នើមរូបនេះ បានថ្លែងអំណរគុណដល់មេធាវីប្រេស៊ីលម្នាក់ និងក្រុមអាជីព ដែលបានផ្តល់ប្រឹក្សាដល់រូបគេក្នុងប្រទេសប៉ារ៉ាហ្គាយ ក៏ដូចជាអ្នកគាំទ្រមួយចំនួនដែលបានផ្តល់កាដូដល់រូបគេ។ រូបគេក៏បានបង្ហោះរូបថតមួយ ដែលបានថតជាមួយនឹងអតីតខ្សែការពារអន្តរជាតិប៉ារ៉ាហ្គាយ Carlos Gamarra ផងដែរ។ ការចាកចេញនេះ បញ្ចប់ទំព័រដ៏ជ្រួលច្របល់មួយ ក្នុងជីវិតរបស់ខ្សែប្រយុទ្ធដ៏ឆ្នើមរូបនេះ ដែលបានជួយឲ្យក្រុមបាល់ទាត់ជម្រើសជាតិប្រេស៊ីល ឈ្នះពាន World Cupក្នុងឆ្នាំ២០០២។
រូបគេត្រូវបានឃាត់ខ្លួន កាលពីថ្ងៃទី៦ ខែមីនា ជាមួយនឹងបងប្រុសរបស់គេ និងអ្នកគ្រប់គ្រងពាណិជ្ជកម្មលោក Roberto Assis នៅពេលដែលពួកគេបានព្យាយាមចូលទៅកាន់ប្រទេសប៉ារ៉ាហ្គាយ ជាមួយនឹងលិខិតឆ្លងដែនសញ្ជាតិប៉ារ៉ាហ្គាយក្លែងក្លាយ។ ពួកគេបានចំណាយពេលអស់៣២ថ្ងៃ ក្នុងមន្ទីរឃុំឃាំងនៅស្ថានីយប៉ូលិស ដោយនៅរួមជាមួយនឹងក្រុមជួញដូរគ្រឿងញៀន នរគបាល និងអ្នកនយោបាយពុករលួយ នៅមុនពេលបង់ប្រាក់ធានាចំនួន១,៦លានដុល្លារអាមេរិក ដើម្បីឃុំខ្លួននៅសណ្ឋគារជំនួសវិញ៕
ប្រភពព័ត៌មាន៖ Channel News Asia
