បរទេស៖ ក្លិប Inter Milan បានបំពេញការព្រមព្រៀងគ្នាមួយដើម្បីចុះហត្ថលេខាជាមួយនឹងខ្សែបម្រើប្រយុទ្ធ Arturo Vidal ពីក្លិប Barcelona ក្នុងតម្លៃខ្លួន១លានអឺរ៉ូ (ស្មើនឹង១,១៧លានដុល្លារអាមេរិក)។
នេះបើយោងទៅតាមការប្រកាសរបស់ក្លិប កាលពីថ្ងៃអង្គារ។ Barca បានឲ្យដឹងក្នុងសេចក្តីថ្លែងការណ៍មួយថា៖ «ក្លិប Barcelona និង Inter Milan បានឈានដល់ការព្រមព្រៀងគ្នាមួយដើម្បីផ្ទេរកីឡាករ Arturo Vidal។ ក្រុមរបស់អ៊ីតាលីមួយនេះ នឹងបង់ប្រាក់ឲ្យក្លិប FC Barcelona ចំនួន១លានអឺរ៉ូ»។ ក្រោយពីចូលរួមកាលពីឆ្នាំ២០១៨ Vidal បានលេងការប្រកួត៩៦លើកសម្រាប់ក្លិប Barcelona និងបានស៊ុតបាល់បញ្ចូលទី១១គ្រាប់ ក៏ដូចជាបានជួយឲ្យពួកគេលើកពាន La Liga ក្នុងឆ្នាំទី១របស់គេ នៅអេស្ប៉ាញ។
ប៉ុន្តែ កីឡាករវ័យ៣៣ឆ្នាំរូបនេះ ត្រូវបានចាត់ទុកថា ជាចំនួនលើសដោយក្លិបនេះ ក្រោយពីការបញ្ចប់រដូវកាលដ៏ខកចិត្តរបស់ពួកគេ កាលពីរដូវកាលមុន ខណៈដែលលោក Josep Maria Bartomeu ប្រធានក្លិប Barca បានទទួលស្គាល់ថា កីឡាករជាច្រើនត្រូវតែចាកចេញ នៅមុនពេលនាំយកកីឡាករថ្មីៗ។ Vidal នឹងវិលទៅចូលរួមជាមួយនឹងលោក Antonio Conte វិញនៅ Inter ដែលជាគ្រូបង្វឹករូបគេបានលេងឲ្យ ក្នុងពេលស្ថិតក្នុងក្លិប Juventus នៅចន្លោះឆ្នាំ២០១១ និង២០១៥ នៅមុនបេលផ្ទេរទៅកាន់ក្លិប Bayern Munich និង Barca៕
ប្រភពព័ត៌មាន៖ Channel News Asia
