បរទេស៖ ខ្សែប្រយុទ្ធ Youssoufa Moukoko របស់ក្លិប Borussia Dortmund ដែលនឹងឈានចូលវ័យ១៦ឆ្នាំនៅថ្ងៃទី២០ ខែវិច្ឆិកានោះ អាចនឹងបង្កើតប្រវត្តិសាស្ត្រក្នុងក្របខ័ណ្ឌ Champions League នៅខែក្រោយ តាមរយៈការក្លាយជាកីឡាករវ័យក្មេងបំផុតក្នុងយុទ្ធនាការនេះ។
លោក Michael Zorc ប្រធានផ្នែកកីឡារបស់ក្លិប Dortmund បានប្រាប់កាសែតប្រចាំថ្ងៃ Bild របស់អាល្លឺម៉ង់ថា៖ «យើងនឹងបញ្ចូលឈ្មោះរូបគេក្នុងបញ្ជី B» សម្រាប់វគ្គចែកពូលនៃក្របខ័ណ្ឌ Champions League ខណៈដែលក្រុម Dortmund ស្ថិតក្នុងពូល F ជាមួយនឹងក្រុម Zenit Saint Petersburg, Brugge និង Lazio។ Moukoko វ័យ១៥ឆ្នាំ ដែលជាខ្សែប្រយុទ្ធដ៏មុតស្រួចនៅក្នុងកីឡាបាល់ទាត់យុវជនអាល្លឺម៉ង់នោះ មិនមែនជាកីឡាករស្ថិតក្នុងបញ្ជី A របស់ក្លិប សម្រាប់យុទ្ធនាការ Champions League ឡើយ។
ប៉ុន្តែ ទោះបីជាយ៉ាងណា រូបគេនឹងស្ថិតក្នុងបញ្ជីក្រុម B ដោយផ្អែកទៅតាមបទបញ្ជារបស់សហព័ន្ធកីឡាបាល់ទាត់អឺរ៉ុប មានន័យថា កីឡាករវ័យ១៦ឆ្នាំ អាចចូលលេងបាន ប្រសិនបើរូបគេស្ថិតក្នុងក្លិបក្នុងរយៈពេលយ៉ាងហោចណាស់២ឆ្នាំ ហើយ Moukoko បានចូលរួមជាមួយនឹងក្លិប Dortmund តាំងពីឆ្នាំ២០១៦ មកម្ល៉េះ។ រូបគេនឹងមានវ័យ១៦ឆ្នាំ ៤ថ្ងៃ នៅមុនពេលក្រុម Dortmund ធ្វើជាម្ចាស់ផ្ទះទទួលក្រុម Brugge ក្នុងវគ្គចែកពូល នាថ្ងៃទី២៤ ខែវិច្ឆិកា ដែលនៅពេលនោះរូបគេអាចក្លាយជាកីឡាករវ័យក្មេងបំផុតក្នុងប្រវត្តិសាស្ត្ររបស់ Champions League៕
ប្រភពព័ត៌មាន៖ Channel News Asia
