បរទេស៖ កីឡាការិនី យ៉ុន យ៉ើន របស់ក្រុមមន្ទីរអយកខេត្តកំពង់ស្ពឺណាហ្គាវើល បាននឹងកំពុងតែបង្កើតឲ្យមានការចាប់អារម្មណ៍កាន់តែខ្លាំង ទៅលើការបង្ហាញទម្រង់លេងរបស់នាង នៅក្នុងការប្រកួតលីគនារី ឬការប្រកួតជើងឯកបាល់ទាត់នារី ឆ្នាំ២០២០ បន្ទាប់ពីប្រធានពាក់លេខ៩រូបនេះ បានបន្ថែមការរកបាន១០គ្រាប់តែម្នាក់ឯង នៅក្នុងការប្រកួតត្រឹម១លើកនោះ។
សម្រាប់ការប្រកួត កាលពីថ្ងៃអាទិត្យ ម្សិលមិញនេះ ក្រុមនារីណាហ្គាវើល បានបង្ហាញការប្រកួតកាន់តែល្អ ដើម្បីរួមគ្នាយកឈ្នះលើក្រុមម្ចាស់ផ្ទះមន្ទីរអយកខេត្តកំពង់ធំ រហូតដល់ ១៦-០ ហើយជាមួយគ្នានេះ ខ្សែប្រយុទ្ធ យ៉ុន យ៉ើន រកបាន១០គ្រាប់តែម្នាក់ឯង បន្ថែមទៅលើការរកបាន១៤គ្រាប់ សម្រាប់ការប្រកួត៣លើក កន្លងមកនេះ គឺមានន័យថា ត្រឹម៤ប្រកួតប៉ុណ្ណោះ យ៉ុន យ៉ើន រកបានគ្រាប់បាល់សរុបរបស់ដល់២៤គ្រាប់។
ជាមួយការលត់ក្រុមម្ចាស់ផ្ទះ ខេត្តកំពង់ធំ យ៉ាងចាស់ដៃ សម្រាប់ការប្រកួតលើកទី៤នេះ បានជួយឲ្យក្រុមនារីណាហ្គាវើល បន្តឈរនៅលើកំពូលតារានៃលីកនារី ជាបណ្តោះអាសន្ន ដោយមាន១២ពិន្ទុពេញ ជាមួយការឈ្នះទាំង៤ប្រកួត និងកំពុងក្លាយជាក្រុម ដែលមានភាពលេចធ្លោរខ្លាំង ព្រមទាំងមានភាគរយខ្ពស់ជាងគេ ក្នុងការឆ្ពោះទៅរកការឈ្នះតំណែងជើងឯក។
យ៉ាងណាមិញ ក្រុមនារីភ្នំពេញក្រោន បានលត់ក្រុមនារីរបស់សមាគមកីឡាបាល់ទាត់កងយោធពលខេមរភូមិន្ទ ១០-០ ដើម្បីហក់ពីលេខ៥ ឡើងមកឈរនៅតំបន់កំពូលតារាងទាំង៤ (Top4) ដោយមាន៨ពិន្ទុ ស្មើជាមួយក្រុមមន្ទីរអយកខេត្តសៀមរាប ដែលបានស្មើគ្នា ២-២ ជាមួយក្រុមមន្ទរអយកខេត្តបាត់ដំបង។
ចំណែកក្រុមមន្ទីរអយកខេត្តស្វាយរៀង បានលត់ក្រុមមន្ទីរអយកខេត្តកណ្តាល ៧-០ ដើម្បីមាន៧ពិន្ទុស្មើជាមួយក្រុមនារីខេត្តបាត់ដំបង រីឯក្រុមនារីបឹងកេត បានទទួល១ពិន្ទុ ជាលើកដំបូង បន្ទាប់ពីពួកគេ បានស្មើ ១-១ ជាមួយក្រុមមន្ទីរអយកខេត្តកំពង់ឆ្នាំង នៅលើទឹកដីខ្លួនឯង កាលពីថ្ងៃអាទិត្យនោះដែរ៕
