បរទេស៖ ហង្សក្រហម Liverpool កំពុងរៀបចំការដេញថ្លៃទឹកប្រាក់ ៣៦ លានផោនសម្រាប់កីឡាករ Eder Militao ពីក្រុមអធិរាជស Real Madrid។ គួរបញ្ជាក់ថាបញ្ហារបួសរបស់កីឡាករខ្សែការពារ កាន់តែធ្វើអោយស្ថានភាពរបស់ក្រុមការពារតំណែងជើងឯកកាន់តែយ៉ាប់យ៉ឺនឡើងអំឡុងពេលសម្រាកប្រកួតលក្ខណៈអន្តរជាតិបន្ទាប់ពី Joe Gomez បង្ខំចិត្តធ្វើការវះកាត់បន្ទាប់ពីរងរបួសសរសៃពួរជង្គង់ធ្ងន់ធ្ងរ ។
Gomez បានក្លាយជាកីឡាករទី២បន្ទាប់ពីមិត្តរួមក្រុម Virgil van Dijk ដែលនិងអវត្តមានរហូតដល់បញ្ចប់រដូវកាល។ ដូច្នេះក្រុមលោក Jurgen Klopp រំពឹងថានឹងចូលប្រឡូកក្នុងទីផ្សារដោះដូរកីឡាករដែលនិងបើកជាលើកទី២នៅខែមករាដើម្បីនំាយកខ្សែការពារកណ្តាលថ្មីម្នាក់ទៀត។
ប្រភពពីអេស្ប៉ាញបានចុះផ្សាយថា Liverpool ចង់បានខ្សែការពារសញ្ជាតិប្រេស៊ីលរូបនេះបន្ទាប់ពី រូបគេនៅមិនទាន់បង្ហាញទម្រង់លេងទទួលបានផ្លែផ្កានៅឡើយទេក្រោយចាកចេញពី Porto មកកាន់ទឹកដី Bernabeu កាលពីខែកក្កដាឆ្នាំ ២០១៩ ខណៈរដូវកាលថ្មីនេះ Militao ទើបបង្ហាញខ្លួនចូលលេងបាន៣ប្រកួតប៉ុណ្ណោះ៕
ប្រភពព័ត៍មាន៖ Sportsmole
