បរទេស៖ ក្រុមបាល់ទាត់ជម្រើសជាតិអ៊ីតាលី ដណ្តើមបានជ័យជម្នះក្នុងលទ្ធផល ២-០ លើក្រុមជម្រើសជាតិប៉ូឡូញ កាលពីថ្ងៃអាទិត្យ ដើម្បីខិតកាន់តែកៀកឆ្ពោះទៅកាន់ជុំផ្តាច់ព្រ័ត្រនៃយុទ្ធនាការ UEFA Nations League បើទោះបីអវត្តមានកីឡាករជាច្រើន និងលោកគ្រូបង្វឹក Roberto Mancini ក៏ដោយ។
ក្រុមជម្រើសជាតិអ៊ីតាលី បានឡើងទៅឈរលើកំពូលតារាងនៃពូល A1 លើក្រុមជម្រើសជាតិហូឡង់ ដែលបានផ្តួលក្រុមជម្រើសជាតិបូស្នី ៣-១ ក្នុងការប្រកួត១គូមុន នាថ្ងៃដដែលនោះ តាមរយៈការផ្តួលក្រុមខ្លាំងប៉ូឡូញ ក្នុងទីក្រុង Reggio Emilia។ ក្រុមជម្រើសជាតិអ៊ីតាលី នឹងឈ្នះកៅអីរបស់ខ្លួនសម្រាប់ការប្រកួតជុំផ្តាច់ព្រ័ត្រនៅខែតុលា ឆ្នាំក្រោយ តាមរយៈការយកឈ្នះលើក្រុមជម្រើសជាតិបូស្នី ក្នុងទីក្រុង Sarajevo នៅថ្ងៃពុធសប្តាហ៍នេះ។ លោក Alberico Evani ដែលជាគ្រូបង្វឹកជំនួយ បានដឹកនាំក្រុមជម្រើសជាតិអ៊ីតាលីម្តទៀត ខណៈដែលលោក Mancini ត្រូវតែទស្សនាការប្រកួតពីផ្ទះរបស់លោក ក្រោយពីបានឆ្លងវីរុសកូរ៉ូណា។
សមាជិកក្រុមរបស់អ៊ីតាលីសម្រាប់ការប្រកួតអន្តរជាតិចំនួន៤១នាក់ ត្រូវបានកាត់បន្ថយមកនៅត្រឹម២៨នាក់ ដោយសារតែរបួស និងការឆ្លងវីរុសកូរ៉ូណា។ សរុបមក កីឡាករចំនួន២០នាក់ដែលអាចស្ថិតក្នុងជម្រើសដាក់ឲ្យចូលលេង សុទ្ធសឹងមិនអាចចូលលេងបាន៕
ប្រភពព័ត៌មាន៖ BBC
