បរទេស៖ ក្លឹប Nice បានបញ្ចប់តំណែងគ្រូបង្វឹកលោក Patrick Vieira ពីតួនាទីកាលពីថ្ងៃសុក្របន្ទាប់ពីអតីតខ្សែបម្រើ-ការពារក្រុមមាន់គកបារាំងនិងក្រុមកាំភ្លើងធំ Arsenal បានដឹកនាំក្លឹប២ ឆ្នាំកន្លះរួចមក។
ក្លឹបដែលកំពុងមានវត្តមាននៅក្របខណ្ឌលីកកំពូលបារាំង Ligue-1 មិនមានលទ្ធផលល្អទេ ក្រោយបរាជ័យ ៥ ប្រកួតជាប់គ្នាៗក្នុងនោះរាប់បញ្ចូលទាំងបរាជ័យលើកចុងក្រោយក្នុងលទ្ធផល ៣ទល់និង២ កាលពីថ្ងៃព្រហស្បតិ៍ក្រោមថ្វីជើងក្រុម Bayer Leverkusen ដែលនាំអោយពួកគេធ្លាក់ចេញពីការប្រកួតពានរង្វាន់ Europa League និងបច្ចុប្បន្នស្ថិតនៅចំណាត់ថ្នាក់លេខ ១១ ពានរង្វាន់។
Vieira ធ្លាប់លេងឱ្យក្រុមបាល់ទាត់អាជីព Man.City, Inter Milan និង Juventus និងធ្លាប់ដឹកនាំក្រុម New York City មុនពេលចូលមកដឹកនាំក្លឹប Nice។ ក្រោយបញ្ចប់តំណែងលោក Vieira ក្លឹបបានសម្រេចតែងតាំងលោក Adrian Ursea ដែលជាជំនួយការ អោយទទួលបន្ទុកដឹកនាំក្លឹបបណ្តោះអាសន្ន៕
ប្រភពព័ត៍មាន៖ BBC
