បរទេស៖ Barcelona មានបំណងចង់លក់ខ្សែបម្រើ Philippe Coutinho អំឡុងពេលទីផ្សារដោះដូរកីឡាករនិងបើកនៅខែមករាឆ្នាំ២០២១ ខាងមុខនេះ។ កីឡាករអន្តរជាតិប្រេស៊ីលវ័យ ២៨ ឆ្នាំរូបនេះបានវិលត្រឡប់មកកាន់ទឹកដី Camp Nou វិញក្រោយលេងក្នុងលក្ខណ្ឌខ្ចីជើងនៅក្លិប Bayern Munich ដោយជួយអោយក្រុមលោកHansi Flick ឈ្នះពាន៣កាលពីរដូវកាលចាស់។
រដូវកាលថ្មីនេះ អតីតកីឡាករក្រុមហង្សក្រហម Liverpool បានជាប់ជម្រើសដំបូងក្រោមការដឹកនាំ របស់លោក Ronald Koeman ដោយបង្ហាញខ្លួនចំនួន ១១ ប្រកួតចូលលេងបានគ្រប់់ក្របខណ្ឌប្រកួតទាំងអស់ដោយរកបាន៣ គ្រាប់និងបង្កើតឪកាសអោយមិត្តរួមក្រុមស៊ុតបញ្ចូលទីបាន ២ដង។
បើទោះបីជាខិតខំបង្ហាញទម្រង់លេងជួយក្រុមតែផ្ទុយទៅវិញយោងគហទំព័រ Diario ARA បានអោយដឹងថា Barcelona មានបំណងចង់លក់កីឡាករដើមកំណើតមកពីទ្វីបអាមេរិកខាងត្បូងរូបនេះ ដើម្បីកាត់បន្ថយប្រាក់ឈ្នួល ព្រោះតែ Coutinho ស្ថិតក្នុងចំណោមកីឡាករដែលមានប្រាក់ឈ្នួលខ្ពស់ខណៈក្លឹបនៅកំពុងដោះស្រាយបញ្ហាវិបត្តិហិរញ្ញ វត្ថុបណ្តាល មកពីការឆ្លងរាលដាលនៃមេរោគកូវីត-១៩៕
