បរទេស៖ លោក Ole Gunnar Solskjaer អ្នកចាត់ការទូទៅរបស់ក្លឹបបិសាចក្រហម Manchester United ត្រូវបានគេរាយការណ៍ថាបានព្យាយាមបញ្ចុះបញ្ចូលខ្សែប្រយុទ្ធឆ្នើមរបស់ក្លឹប Borussia Dortmund កីឡាករ Erling Haaland អោយផ្ទេរមកកាន់ទឹកដី Old Trafford ពេលទីផ្សារដោះដូរកីឡាករខាងមុខ។
ទោះបីជាកិច្ចសន្យាចាកចេញរបស់ Erling Haaland អាចដំណើរការបាននៅរដូវកាលក្រោយក៏ពិតមែន ប៉ុន្តែខ្សែប្រយុទ្ធ ន័រវែស រូបនេះបានប្រាប់ភ្នាក់ងារផ្ទាល់ខ្លួនរបស់គេថារូបគេចង់ចាកចេញនៅក្នុងទីផ្សារដោះដូររដូវក្តៅខាងមុខនេះ។ មានក្លឹបជាច្រើនដូចជា Real Madrid, Man City, Chelsea និង Barcelona សុទ្ធតែមានពាក្យចរចាមរាមថាចាប់អារម្មណ៍លើកីឡាករវ័យ២០ឆ្នាំរូបនេះ។
ក្លឹប Manchester United ក៏ជាក្លឹបមួយដែលគេជឿជាក់យ៉ាងមុតមាំថានឹងអាចមានភាគរយខ្ពស់ក្នុងចុះហត្ថលេខាលើ Haaland ហើយយោងទៅតាមសារព័ត៍មាន AS បានអោយដឹងថាលោក Ole Gunnar Solskjaer កំពុងតែធ្វើការបញ្ចុះបញ្ចូលរូបនេះអោយចូលរួមជាមួយនឹងក្រុមរបស់ខ្លួននៅរដូវក្តៅខាងមុខនេះ។ របាយការណ៍បានអះអាងថាគ្រូបង្វឹកក្លឹបម្ចាស់ជើងឯកពានរង្វាន់ Premier League ២០សម័យកាលរូបនេះបានព្យាយាមបញ្ចុះបញ្ចូលអោយ Haaland មកកាន់ទឹកដី Old Trafford ហើយប្រាប់អោយរូបគេបដិសេធសំណើររបស់ក្លឹបដទៃទៀតទាំងអស់។ គួរបញ្ជាក់ផងដែលថា Haaland ធ្លាប់ជាកូនក្រុមរបស់លោក Ole Gunnar Solskjaer កាលពីនៅក្លឹប Molde មុននឹងចូលរួមជាមួយនឹង Red Bull Salzburg៕
ប្រភពព័ត៍មាន៖ Sportsmole
