បរទេស៖ លោក Gareth Southgate បានសាទរដល់ដំណើរជីវិតដ៏អស្ចារ្យរបស់ Ollie Watkins ក្នុងការបង្ហាញខ្លួនជាលើកដំបូងសម្រាប់ក្រុមបាល់ទាត់ជម្រើសជាតិអង់គ្លេស ក្រោយពីខ្សែប្រយុទ្ធរបស់ក្លិប Aston Villa រូបនេះ បានស៊ុតបាល់បញ្ចូលទី ក្នុងពេលក្រុមខ្លួនដណ្តើមបានជ័យជម្នះ ៥-០ លើក្រុមសាំងម៉ារ៉ាំង ក្នុងការប្រកួតជម្រុះបើកឆាកនៃយុទ្ធនាការ World Cup កាលពីថ្ងៃព្រហស្បតិ៍។
កាលពី៤ឆ្នាំមុន Watkins ត្រឹមតែអាចលេងក្នុងក្របខ័ណ្ឌលំដាប់ទី៤របស់អង់គ្លេសជាមួយនឹងក្លិប Exeter ប៉ុណ្ណោះ។ កីឡាករវ័យ២៥ឆ្នាំរូបនេះ បានទទួលជោគជ័យយ៉ាងធំធេងចាប់តាំងពីពេលនោះមក តាមរយៈការចូលរួមជាមួយនឹងក្លិប Brentford ក្នុងឆ្នាំ២០១៧ មុនពេលផ្ទេរទៅកាន់ក្លិប Aston Villa កាលពីឆ្នាំមុន ក្រោយពីបានបញ្ចប់ក្នុងនាមជាអ្នករកបានគ្រាប់បាល់ច្រើនជាងគេក្នុងក្របខ័ណ្ឌ Brentford។ រូបគេបានស៊ុតបាល់បញ្ចូលទី១២គ្រាប់ ក្នុងរដូវកាលទី១របស់គេជាមួយនឹងក្លិបស្ថិតក្នុងក្របខ័ណ្ឌ Premier League មួយនេះ ដែលនាំឲ្យរូបគេទទួលបានការកោះហៅឲ្យចូលរួមជាមួយនឹងក្រុមជម្រើសជាតិអង់គ្លេស និងបង្ហាញខ្លួនជាលើកដំបូងពេលប្រកួតជាមួយនឹងក្រុមសាំងម៉ារ៉ាំង នាកីឡដ្ឋាន Wembley។
លោក Southgate គ្រូបង្វឹករបស់ក្រុមអង់គ្លេស បានកត់សម្គាល់ឃើញពីកម្រិតលេងដ៏ល្អរបស់ Watkins តាមរយៈការបញ្ជាក់ថា៖ «រឿងដំបូងដែលអ្នកបានឃើញ គឺការបញ្ចេញប្រតិកម្មរបស់ក្រុម។ នោះគឺជាការបង្ហាញពីកម្រិតលេងដែលស៊ីសង្វាក់គ្នា។ Watkins បានបង្ហាញពីល្បឿន និងបច្ចេកទេសលេងដ៏ល្អ ដែលនោះគឺជាដំណើរជីវិតដ៏អស្ចារ្យរបស់គេ»៕
ប្រភពព័ត៌មាន៖ Channel News Asia
