បរទេស៖ កីឡាករ Lewis Hamilton បានបង្ហាញពីទេពកោសល្យនៃការបើកបរដ៏គួរឲ្យភ្ញាក់ផ្អើលមួយផ្សេងទៀត កាលពីថ្ងៃអាទិត្យ ដើម្បីរារាំងការប្រជែងពីសំណាក់កីឡាករ Max Verstappen និងដើម្បីឈ្នះការប្រណាំងបើករដូវកាល Bahrain Grand Prix ដ៏រំភើប។
ម្ចាស់ការពារជើងឯកពិភពលោក៧សម័យកាលរូបនេះ បានការពារការនាំមុខរបស់ខ្លួនតាមរយៈការប្រើប្រាស់ជំនាញដ៏ពិសេសរបស់ខ្លួន នៅក្នុងការប្រណាំងប៉ុន្មានជុំចុងក្រោយ ជាមួយនឹងរថយន្ត Mercedes ដើម្បីរារាំងពីការប្រជែងពីសំណាក់កីឡាកររបស់ក្រុម Red Bull និងដើម្បីឈ្នះការប្រណាំងជាលើកទី៩៦របស់គេ។ Hamilton បាននាំមុខក្នុងថិរវេលា០,៧វិនាទី លើកីឡាករហូឡង់ Verstappen ដែលត្រូវបានបង្ខំឲ្យបោះបង់ការនាំមុខរបស់ខ្លួន នៅជិតបញ្ចប់ការប្រកួត ក្រោយពីបានជែងនាំមុខលើម្ចាស់ការពារតំណែងជើងឯក ប៉ុន្តែ បែរជាបើកធ្លាក់ផ្លូវ និងហួសខ្សែបន្ទាត់កំណត់។
Hamilton បាននិយាយទាំងក្តីរីករាយថា៖ «ជាដំបូង ខ្ញុំអាចនិយាយបានថា នេះគឺជាលើកទី១ហើយដែលខ្ញុំបានឃើញអ្នកគាំទ្រក្នុងរយៈពេលជាយូរមកនេះ»៕
ប្រភពព័ត៌មាន៖ Channel News Asia