សកម្មភាព និងព្រឹត្តិការណ៍ប្រកួតកីឡា នៅក្នុងប្រទេសកម្ពុជា ត្រូវបានបិទទាំងស្រុងតែម្តង បន្ទាប់ពីកម្មវិធីប្រកួតកីឡាដ៏មានប្រជាប្រិយធំៗចំនួន២ គឺការប្រកួតប្រដាល់គុនខ្មែរ នៅតាមសង្វៀនឯកជន និងការប្រកួតបាល់ទាត់លីគកំពូលកម្ពុជា ប្រចាំឆ្នាំ២០២១ ត្រូវបានសម្រេចផ្អាក និងពន្យារពេលប្រកួតដែរនោះ។
គួរបញ្ជាក់ថា សកម្មភាពប្រកួតកីឡា ត្រូវបានផ្អាក និងពន្យារពេលប្រកួតស្ទើរតែទាំងស្រុង តាំងពីចុងខែកម្ភៈ ពោលគឺបន្ទាប់ពីការផ្ទុះឡើងជាថ្មីនៃការឆ្លងជំងឺកូវីដ១៩ ក្នុងព្រឹត្តិការណ៍សហគមន៍ ២០ កុម្ភៈ បានកើតមានឡើង។
យ៉ាងណាក៏ដោយ នៅក្នុងអំឡុងពេលដ៏គ្រោះថ្នាក់នោះ គឺនៅសល់តែការប្រកួត២ប៉ុណ្ណោះ បានដំណើរការប្រកួតជាធម្មតា ក្នុងលក្ខខណ្ឌបិទទ្វារ មិនឱ្យមានអ្នកទស្សនាផ្ទាល់ គឺប្រដាល់គុនខ្មែរ នៅតាមសង្វៀនឯកជន និងកីឡាបាល់ទាត់ ដែលមានការប្រកួតលីគកំពូលកម្ពុជា និងការប្រកួតថ្នាក់ខេត្តពានរង្វាន់សម្តេច ហ៊ុន សែន ប្រចាំឆ្នាំ២០២១ ប៉ុន្តែនៅពេលនេះ ព្រឹត្តិការណ៍ប្រកួតនៅលើប្រភេទកីឡាដ៏ពេញនិយមទាំង២នេះ បានសម្រេចផ្អាក និងពន្យារពេលប្រកួត អស់ហើយ។
ទាំងថ្នាក់ដឹកនាំសហព័ន្ធកីឡាប្រដាល់គុនខ្មែរ និងមន្រ្តីបច្ចេកទេសរបស់គណៈកម្មការប្រកួតបាល់ទាត់ជាតិកម្ពុជា នៃសហព័ន្ធកីឡាបាល់ទាត់កម្ពុជា បានចេញសេចក្តីប្រកួតរៀងៗខ្លួន តាំងពីសប្តាហ៍មុន ដើម្បីផ្អាក និងពន្យារការប្រកួត នៅលើប្រភេទកីឡារបស់ខ្លួន រហូតដល់ថ្ងៃទី២៨ ខែមេសា ឆ្នាំ២០២១នេះដូចគ្នា។
ការសម្រេចផ្អាក និងពន្យារពេលប្រកួតនៅលើប្រភេទកីឡាដ៏មានប្រជាប្រិយភាពទាំង២នេះ គឺធ្វើឡើង ដើម្បីចូលរួមទប់ស្កាត់ការរីករាលដាននៃជំងឺកូវីដ១៩ ជាមួយរាជរដ្ឋាភិបាលកម្ពុជា និងក្រសួងសុខាភិបាល ដោយលោកនាយករដ្ឋមន្រ្តី ហ៊ុន សែន បានសម្រេចបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ នៃខេត្តកណ្តាល ចំនួន២សប្តាហ៍ គឺចាប់ពីថ្ងៃទី១៥ រហូតដល់ទី២៨ ខែមេសា ឆ្នាំ២០២១៕
