បរទេស៖ ក្លឹបតោខៀវ Chelsea និងក្លឹបបិសាចក្រហម Manchester United បានបង្ហាញការចំណាប់អារម្មណ៍ក្នុងការចុះហត្ថលេខាលើខ្សែប្រយុទ្ធឆ្នើម Kelechi Iheanac​ho របស់ក្រុម Leicester City ដែលជាដំណោះស្រាយបញ្ហាមួយសម្រាប់ក្លឹបរបស់ពួកគេនៅតំបន់ប្រយុទ្ធនាពេលបច្ចុប្បន្ននេះ។

អតីតយុវជនថ្នាលរបស់ក្លឹប Man City រូបនេះបានបង្ហាញទម្រង់លេងយ៉ាងល្អសម្រាប់ក្រុមរហស្សនាមកញ្ជ្រោងខៀវនៅរដូវកាលនេះ​ហើយក្រៅពីនេះមានក្លឹប​បាល់​ទាត់ជា​ច្រើនទៀត​លីគ​កំពូល​អង់គ្លេសបានសម្តែងការចាប់អារម្មណ៍ចង់បានរូបគេមកចូលរួមក្រុម Iheanacho កីឡាករអន្តរជាតិនីហ្សេរីយ៉ា បានចូលរួមហ្វឹកហាត់ក្នុងក្រុមយុវជនរបស់ក្លឹប Man City ក្នុងឆ្នាំ ២០១៤ និងបង្ហាញខ្លួន​ឈុតធំជាលើកដំបូងក្នុងឆ្នាំ ២០១៥។ ទោះយ៉ាងណាកីឡាករវ័យ ២៤ ឆ្នាំរូបនេះចូលលេងបាន២៩ប្រកួតនៅក្នុងរដូវកាលទី ២ ចន្លោះឆ្នាំ២០១៦-២០១៧ មុនពេលត្រូវក្លឹប Leicester City ចំណា២៥លានផោនទិញយកទៅរួមក្រុម។ បច្ចុប្បន្ន Iheanacho ជាជម្រើសទី១របស់ក្លឹប Leicester ដោយស៊ុតបញ្ចូលទីបាន ១៥ គ្រាប់ក្នុងការបង្ហាញខ្លួនចំនួន ៣១ លើកគ្រប់ក្របខណ្ឌការប្រកួតទាំងអស់។

លោក Thomas Tuchel មានបំណងចង់បំពេញចន្លោះប្រហោងសម្រាប់ក្រុម ក្រោយពីមិនបង្ហាញការជឿជាក់ លើខ្សែប្រយុទ្ធ  Timo Werner និង Tammy Abraham ស្របពេល Olivier Giroud ត្រៀមចាកចេញពីក្លឹបនៅរដូវក្តៅនេះ។ រីឯក្រុម Man Utd របស់លោក Ole Gunnar Solskjaer ក៏មានបំណងចង់ចុះកុងត្រាកីឡាករពាក់អាវលេខ ៩ រូបនេះផងដែរ ក្រោយពីពួកគេពឹងផ្អែកលើការរកគ្រាប់បាល់ ច្រើនពីសំណាក់ខ្សែប្រយុទ្ធ Edinson Cavani ខណៈ Rashford និង Martial ឧស្សាហ៏ជួបបញ្ហារបួសនាពេលកន្លងមកនេះ៕

ប្រភពព័ត៍​មាន៖ Sportsmole