បរទេស៖ ក្លឹបអ្នកមានបុណ្យ FC Barcelonna កំពុងបើកកិច្ចពិភាក្សាចរចារពីលទ្ធភាពចុះហត្ថលេខានាំយកខ្សែប្រយុទ្ធ Memphis Depay ពីក្លិប Lyon មកកាន់ទឹកដី Camp Nou នៅរដូវក្តៅខាងមុខនេះ បន្ទាប់ពីខកខានកាលពីរដូវកាលមុន។ កីឡាករអន្តរជាតិហូឡង់វ័យ ២៧ ឆ្នាំរូបនេះបានបង្ហាញទម្រង់លេងគួរឱ្យចាប់អារម្មណ៍ សម្រាប់ក្លឹបនៅលីកកំពូលបារាំងនៅរដូវកាលនេះ ដោយអាចរកបាន ២០ គ្រាប់និងបង្កើតឱកាស ៩ ដងក្នុងការបង្ហាញខ្លួន ៣៥ លើកគ្រប់កម្មវិធីទាំងអស់។
គួរបញ្ជាក់ផងដែលថាកិច្ចសន្យារបស់អតីតកីឡាករក្លឹប Man Utd រូបនេះជាមួយនឹងក្លឹប Lyon នឹងត្រូវផុតកំណត់នៅចុងខែមិថុនានេះ ស្របពេលការចុះកុងត្រាថ្មីជាមួយក្លឹបនៅមិនទាន់ចេញជារូបរាងនៅឡើយ ក៏ព្រោះតែ Depay ក៏កំពុងពិចារណាចង់លេងមីក្រោមការដឹកនាំរបស់លោក Ronald Koeman ម្តងទៀតក្រោយធ្លាប់ធ្វើការរួមគ្នានៅក្រុមជម្រើសជាតិ។
Memphis បានស៊ុតបាល់បញ្ចូលទីសរុប ៧៤ គ្រាប់និង Assist ដល់ទៅ ៥២ លើកក្នុងការចូលលេង ១៧៣ ប្រកួតសម្រាប់ Lyon ក្រោយចាកចេញពីទឹកដី Old Trafford មកកាន់កីឡាដ្ឋាន Groupama កាលពីឆ្នាំ២០១៧៕
ប្រភពព័ត៍មាន៖ Sportsmole
