បរទេស៖ លោក Andrea Pirlo បានបញ្ជាក់ថា លោកចង់បន្តធ្វើជាគ្រូបង្វឹករបស់ Juventus ក្រោយពីបានលើកពានជាលើកទី២របស់លោកនៅរដូវកាលនេះ តាមរយៈការឈ្នះពាន Coppa Italia។ ក្រុមដែលទើបតែបានបាត់បង់តំណែងជើងលីកមួយនេះ បានផ្តួលក្រុម Atalanta ក្នុងលទ្ធផល ២-១ ដើម្បីឈ្នះពាន Italian Cup ជាលើកទី១៤ ក្រោយពីបានឈ្នះពាន per Cup កាលពីខែមករា។
កីឡាករ Federico Chiesa បានរកគ្រាប់បាល់ឈ្នះ នៅរយៈពេល១៧នាទីចុងក្រោយ ក្រោយពី Dejan Kulusevski បានស៊ុតបាល់បញ្ចូលទីនៅនាទី ទី៣០ ក្នុងការប្រកួតមួយដែលបានលេងនៅពីមុខអ្នកគាំទ្រជាលើកដំបូង ក្នុងរយៈពេល១ឆ្នាំ។ លោក Pirlo ដែលបានឈានចូលវ័យ៤២ឆ្នាំ កាលពីថ្ងៃពុធ បានឲ្យដឹងថា៖ «នេះគឺជាការប្រកួតដ៏អស្ចារ្យរវាងក្រុមខ្លាំង២ ដែលបានប្រយុទ្ធរហូតដល់ទីបញ្ចប់។ ការប្រកួតវគ្គផ្តាច់ព្រ័ត្រពិតជាមានតម្លៃណាស់ ហើយក៏ជាការអបអរដ៏ពីមុខអ្នកគាំទ្រផងដែរ ស្របពេលដែលនៅរដូវកាលនេះ អ្វីៗទាំងអស់បានកើតឡើង»។
លោកបានបន្ថែមទៀតថា៖ «ខ្ញុំចង់បន្តអង្គុយក្នុងកៅអីរបស់ Juventus ម្តងទៀតនៅឆ្នាំក្រោយ។ ខ្ញុំគិតថា ខ្ញុំបានធ្វើការងាររបស់ខ្ញុំកាន់តែល្អពីមួយថ្ងៃទៅមួយថ្ងៃ ដោយព្យាយាមឈ្នះក្នុងវគ្គផ្តាច់ព្រ័ត្រ។ ខ្ញុំចង់បន្ត ខ្ញុំស្រឡាញ់ក្លិបនេះ»៕
ប្រភពព័ត៌មាន៖ Channel News Asia
