បរទេស៖ ក្រុម Paris Saint-Germain កំពុងតែសម្លឹងរកការឈ្នះពាន២នៅរដូវកាលនេះ ក្រោយពីពួកគេបានឈ្នះពាន French Cup តាមរយៈការផ្តួលក្រុម Monaco ក្នុងលទ្ធផល ២-០ ក្នុងការប្រកួតវគ្គផ្តាច់ព្រ័ត្រនាកីឡដ្ឋាន Stade de France កាលពីថ្ងៃពុធ។
គ្រាប់បាល់ស៊ុតបញ្ចូលទីពីសំណាក់ខ្សែប្រយុទ្ធ Mauro Icardi និង Kylian Mbappe បានជួយឲ្យ PSG ដណ្តើមបានជ័យជម្នះក្នុងវគ្គផ្តាច់ព្រ័ត្រ ខណៈដែលពួកគេបច្ចុប្បន្ន ពួកគេនឹងឈានទៅកាន់ការប្រកួតជុំចុងក្រោយនៃក្របខ័ណ្ឌ Ligue 1 នៅចុងសប្តាហ៍នេះ ជាមួយនឹងការនៅតែមានឱកាសក្នុងការឈ្នះពាន Ligue 1 ជាលើកទី១០។ បច្ចុប្បន្ន ក្រុមម្ចាស់ជើងឯករបស់បារាំងមួយេះ បានឈ្នះពាន French Cup ៦លើក ក្នុងរដូវកាល៧លើកចុងក្រោយ ក្រោយពីបានឈានទៅវគ្គផ្តាច់ព្រ័ត្រជារៀងរាល់ឆ្នាំ បើគិតចាប់តាំងពីឆ្នាំ២០១៥។ នេះគឺជាការឈ្នះពានជាលើកទី២ក្នុងអាជីពជាអ្នកគ្រូបង្វឹករបស់លោក Mauricio Pochettino ក្រោយពីលោកបានឈ្នះពាន Champions Trophy ជាមួយនឹងក្រុម PSG កាលពីខែមករា ប៉ុន្តែ ពាននេះ នៅតែជាពានដ៏ធំជាលើកដំបូងក្នុងអាជីពជាគញូបង្វឹករសប់លោក។
ស្របពេលជាមួយគ្នានេះ ក្រុម Monaco នឹងត្រូវបន្តរង់ចាំដើម្បីឈ្នះពាន French Cup ជាលើកទី១ បើគិតចាប់តាំងពីឆ្នាំ១៩៩១ ខណៈដែលនេះ គឺជាការប្រកួតវគ្គផ្តាច់ព្រ័ត្រ ជាលើកទី១របស់ពួកគេ បើគិតចាប់តាំងពីឆ្នាំ២០១០ ដែលនៅពេលនោះ ពួកគេក៏បានចាញ់ក្រោមស្នាដៃក្រុម PSG ផងដែរ៕
ប្រភពព័ត៌មាន៖ Channel News Asia
