កីឡាករជើងចាស់ ធា នុរាជ ត្រូវបានគូប្រកួតវ៉ៃឡើងចង់ទក់សាច់ មិនពេលសន្លប់ធំ សម្រាប់ការបង្ហាញខ្លួន ក្នុងព្រឹត្តិការណ៍ថ្មី Onestrike នៅសង្វៀន PNN ចំណែក សេក គឹមសាន្ត បានទម្លាក់ សយ សុខ ក្នុងវគ្គជម្រុះបើកឆាក ប៉ុន្តការប្រកួតទាំង២គូនេះ មិនទទួលបានការចាប់អារម្មណ៍ខ្លាំងដូចការប្រកួតម៉ារ៉ាតុងដណ្តើមប្រាក់លាន រវាងកីឡាករថ្នាលជំនាន់ថ្មី នោះទេ។
បើទោះបីជា ធា នុរាជ មានបទពិសោធប្រកួតច្រើន នៅលើសង្វៀន ប៉ុន្តែសម្រាប់ការបង្ហាញខ្លួន ក្នុងព្រឹត្តិការណ៍ Onestrike ដែលមានត្រឹម២ទឹក ហើយ១ទឹក មាន៧នាទីនេះ ធា នុរាជ ត្រូវបានជើងថ្មី សោម ពិសិដ្ឋ វាយឡើងចង់ទក់សាច់ មុនពេលសន្លប់ នៅទឹកទី២។
តាមរយៈការប្រកួត កាលពីថ្ងៃអាទិត្យ ម្សិលមិញនេះ ធា នុរាជ ធ្វើបានល្អតែដើមទឹកទី១ទេ តែនៅចុងទឹកនេះ រូបគេត្រូវបាន សោម ពិសិដ្ឋ វាយកែងដួល នាំឱ្យអាជ្ញាកណ្តាលរាប់ និងបន្តរាប់ជាលើកទី២ នៅពេល ពិសិដ្ឋ បានលោតបុកជង្គង់ថែម ចូលពេញទៀតនោះ ប៉ុន្តែសំឡេងស្នូរជួងបញ្ចប់ការប្រកួតទឹកទី១ ជួយសង្គ្រោះ ធា នុរាជ បានមួយគ្រា។
យ៉ាងណាក៏ដោយ ឈានចូលទឹកទី២ សោម ពិសិដ្ឋ បានសំដៅទៅលើកញ្ចឹងក ធា នុរាជ ខ្លាំងៗ ហើយស្ថិតក្នុងពេលដែល ធា នុរាជ ចាប់ផ្តើមវង្វេងវង្វាន់ជាថ្មីនោះ ពិសិដ្ឋ បានម៉ាត់ចូលពេញ រួចបន្ថែមដោយជង្គង់ឆ្វេងចូលពេញ បណ្តាលឱ្យ ធា នុរាជ ដួលដេក ត្រូវជ្ញាកណ្តាលរាប់ ជាលើកទី៣ និងឈានដល់ការសន្លប់ធំ ក្រោកលែងរួចតែម្តង នៅពេល ពិសិដ្ឋ បានទាត់ចូលដើមទ្រូង ឡើងខ្ទាត់ និងដួលផ្កាប់មុខ ទាំងជំហរនោះ។
ជាមួយការបរាជ័យយ៉ាងគ្រាំគ្រានេះ ធា នុរាជ បានក្លាយជាកីឡាករទី៣ ដែលបានសន្លប់ ក្នុងការប្រកួត Onestrike នេះ ខណៈ ២សប្តាហ៍កន្លងមកនេះ ភិន សុចាន់ទី និងឃន គឹមហេង ក៏បានសន្លប់ ក្នុងព្រឹត្តិការណ៍នេះដែរ ប៉ុន្តែការសន្លប់របស់ ធា នុរាជ ពិតជាគ្រាំគ្រាខ្លាំង ព្រោះរូបគេ ត្រូវបានអ្នកឱ្យទឹកជួយគ្រាចុះពីលើសង្វៀនទាំងវេទនា។ ចំណែក សោម ពិសិដ្ឋ បានទទួលប្រាក់រង្វាន់បន្ថែមចំនួន១លានរៀល ចំពោះការផ្តួល ធា នុរាជ ឱ្យ សន្លប់នេះ។
ចំណែកការប្រកួតជម្រុះដណ្តើមខ្សែក្រវាត់វិញ កីឡាករជើងថ្មី សយ សុខ ដែលបានបង្ហាញក្តីបារម្ភខ្លាំង និងខ្លាចសមត្ថភាពរៀមច្បង សេក គឹមសាន្ត តាំងពីមុនការប្រកួតនោះ ពិតជាបានជួបការបរាជ័យមែន និងបានធ្លាក់ចេញពីការប្រកួតដណ្តើមខ្សែក្រវាត់នេះ ត្រឹមវគ្គជម្រុះបើកឆាក១៨នាក់នេះតែម្តង។
តាមរយៈការប្រកួតនោះ សយ សុខ បានព្យាយាមវាយបកសងទៅលើ សេក គឹមសាន្ត រហូតចប់៥ទឹកពេញ ប៉ុន្តែការវាយចេញរបស់ សេក គឹមសាន្ត ចំគោលដៅបានល្អជាង ជាហេតុនាំឱ្យចៅក្រមទាំង៥ សម្រេចផ្តល់ពិន្ទុឱ្យ គឹមសាន្ត ឈ្នះពិន្ទុ សយ សុខ ជាឯកច្ឆន្ទ ៥-០ តែម្តង។ ហេតុនេះ សេក គឹមសាន្ត បានក្លាយជាបេក្ខភាពទី៣ ដែលត្រូវឡើងទៅអង្គុយចាំ នៅវគ្គ៨នាក់ចុងក្រោយ ជាមួយជើងខ្លាំង ប៊ុន សុធា និង ឡុង រ៉ាមី ដែលសុទ្ធតែបានឈ្នះ នៅក្នុងវគ្គនេះ។
យ៉ាងណាក៏ដោយ ការប្រកួតម៉ារ៉ាតុងដណ្តើមប្រាក់លានរវាងកីឡាករថ្នាលគុនខ្មែរជំនាន់ថ្មី ធន់ ដារ៉ា, លីន សុផែន, សូដា ម៉ាឡាយ និង ឡុង ស៊ីណាត ពិតជាមានការជក់ចិត្តខ្លាំង និងទទួលបានការគាំទ្រច្រើន ព្រោះអ្នកទាំង៤នេះ បានវាយគ្នាអស់ពីចិត្តតែម្តង ជាពិសេសការប្រកួតជម្រុះ៣ទឹករវាង ធន់ ដារ៉ា និង លីន សុផែន ព្រោះ ដារ៉ា បានទាត់ សុផែន ឱ្យមានបញ្ហាជើងក្រោម និងអាជ្ញាកណ្តាលរាប់ តាំងពីទឹកទី១ ប៉ុន្តែ សុផែន នៅតែព្យាយាមចូលវាយប្តូររហូតចប់៣ទឹក និងចាញ់ត្រឹមពិន្ទុប៉ុណ្ណោះ។
យ៉ាងណាមិញ សម្រាប់ការឡើងទៅជួប សូដា ម៉ាឡាយ នៅវគ្គផ្តាច់ព្រ័ត្រ ក៏មានភាពស្វិតស្វាញដែរ។ សូដា ម៉ាឡាយ ពេលយកឈ្នះ ឡុង ស៊ីណាត នៅវគ្គជម្រុះ ហាក់មិនរឹងមាំទេ ប៉ុន្តែពេលឡើងមកប៉ះ ធន់ ដារ៉ា គឺបានចូលវាយប្តូរអស់ពីចិត្ត ប៉ុន្តែនៅមិនអាចឈ្នះ ដោយចាញ់ដោយពិន្ទុមិនឯកច្ឆន្ទ ៤-១ ហេតុនេះ ដារ៉ា បានក្លាយជើងឯក អមដោយប្រាក់រង្វាន់ ១,២លានរៀល។
ដោយអត់សរសេរដល់ការប្រកួតរវាងកីឡាករវ័យក្មេងទាំង៤នាក់នេះ មិនបាន លោក ស្រ៊ឺ ស្រេង ហៅ សំណព្វ អ្នកគ្រប់គ្រងការប្រកួតប្រដាល់ នៅសង្វៀន PNN បាននិយាយ ក្នុងពេលលោកធ្វើពិធីករថា៖ «ខ្ញុំពិតជាអរគុណនិងសរសើរខ្លាំង ដល់ប្អូនៗ គឺខ្លួននៅក្មេង និងតូចៗទេ ប៉ុន្តែបានប្រឹងប្រែងប្រកួត គឺអស់ពីសមត្ថភាពតែម្តង ធ្វើឱ្យអ្នកគាំទ្ររបស់យើង មានការពេញចិត្ត និងជក់ចិត្តខ្លាំង»៕
