ការប៉នប៉ងដាក់កីឡាប្រដាល់គុនខ្មែរ ឬ គុនខ្មែរ ដើម្បីឱ្យអន្តរជាតិទទួលស្គាល់ជាផ្លូវការថា ជារបស់ខ្មែរនោះ ហាក់លែងមានច្រកទៀតហើយ បន្ទាប់ពីប្រដាល់ Muay Thai របស់ថៃ ដែលមានលំនាំប្រកួតដូចគុនខ្មែរ ត្រូវបានគណៈកម្មការប្រតិបត្តិ នៃគណៈកម្មកាធិការអូឡាំពិកអន្តរជាតិ (IOC) ប្រកាសទទួលស្គាល់ជាផ្លូវការ នៅក្នុងកិច្ចប្រជុំ លើកទី១៣៨ របស់ IOC នាទីក្រុងតូក្យូ ប្រទេសជប៉ុន កាលពីពេលថ្មីៗនេះ។
ការប្រកួតទទួលស្គាល់កីឡាករ Muay Thai ពីស្ថាប័នកំពូលរបស់ IOC វាជាជោគជ័យដ៏ធំធេងសម្រាប់ប្រទេសថៃ ខណៈសហព័ន្ធ Muay Thai របស់ប្រទេសនេះ កៀកគរបានប្រទេសជាសមាជិករហូតដល់ ១៤៦ប្រទេស សម្រាប់ការជំរុញឱ្យមានការទទួលស្គាល់ពី IOC នេះ ដោយ Muay Thai បានព្យាយាមអស់រយៈពេលជាច្រើនឆ្នាំមកហើយ ទម្រាំទទួលបានលទ្ធផល ដូចពេលនេះ។
ផ្ទុយពីនេះ ប្រជាជនកម្ពុជា ពិសេសអ្នកស្រឡាញ់ក្បាច់គុនមរតកដូចនា «គុនខ្មែរ» បានការបាក់ទឹកចិត្ត និងអស់សង្ឃឹម ទៅនឹងដំណឹងមួយនេះ ព្រោះការប្រកាសនេះ វាហាក់បិទច្រក សម្រាប់កម្ពុជា ក្នុងការដាក់ គុនខ្មែរ ទៅលើឆាកអន្តរជាតិទៅហើយ បើទោះបីជាប្រវត្តិសាស្រ្តពីមុន ត្រូវបានគេដឹងថា Muay Thai បានចម្លងចេញពីប្រដាល់គុនខ្មែរ ក៏ដោយ។
យ៉ាងណាក៏ដោយ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ ហាក់មិនបានបង្ហាញការតូចចិត្ត ឬភ្ញាក់ផ្អើល ទៅនឹងដំណឹងនៃការទទួលស្គាល់របស់ Muay Thai ពីស្ថាប័ន IOC ប៉ុន្មានឡើយ ហើយលោកក៏មិនខ្វល់ទៅនឹងការរិះគន់ពីមហាជន ទៅលើសហព័ន្ធរបស់លោក ដែលមានភាពអសកម្ម ក្នុងការជំរុញគុនខ្មែរ ទៅកាន់ពិភពលោក នោះដែរ។
លោក តែម ម៉ឺន បានប្រាប់ប្រព័ន្ធផ្សព្វផ្សាយក្នុងស្រុកមួយថ្លែងថា៖ «ការទទួលស្គាល់កីឡា Muaythai (ពី IOC) ជាកិច្ចការ តាមលក្ខខណ្ឌរបស់គេ អ៊ីចឹងយើងមិនអាចមានមតិ ឬយោបល់យ៉ាងណាទេ ចំណែកមតិរបស់មហាជន ដែលមានការគាំទ្រ ឬរិះគន់ថា កីឡាគុនខ្មែរ មិនរីកចម្រើនដូចគេ ក៏ជាសិទ្ធិឯកជនរបស់គេដែរ ដែលយើង គ្មានសិទ្ធិ ហាមឃាត់ពួកគេបានទេ»។
លោក តែម ម៉ឺន ដែលជាអគ្គលេខាធិការរង NOCC ផងនោះ បានប្រាប់បន្ថែមថា៖ «គ្រប់ប្រភេទកីឡាទាំងអស់ នៅលើពិភពលោក សុទ្ធតែមានការប្រកួតប្រជែង ហើយលទ្ធផល វាអាស្រ័យទៅលើសមត្ថភាព និងធនធានតាមប្រទេសរៀងៗខ្លួន ពោលគឺមិនអាចចោទ ឬទម្លាក់កំហុស ទៅខាងណាបានឡើយ»។
យ៉ាងណាក៏ដោយ លោក វ៉ាត់ ចំរើន អគ្គលេខាធិការ NOCC ដែលកំពុងដឹកនាំប្រតិភូកីឡាកម្ពុជា ចូលរួមការប្រកួតកីឡាអូឡាំពិក នៅទីក្រុងតូក្យូ ឆ្នាំ២០២០ នេះ ស្រាប់ បានពន្យល់ពីអត្ថន័យពិតនៃការប្រកួតរបស់ IOC យ៉ាងដូច្នេះថា៖ «IOC ទទួលស្គាល់កីឡា Muaythai និងសហព័ន្ធអន្តរជាតិ នៃសមាគម IFMA ព្រមទាំងប្រភេទជាច្រើនទៀតនេះ ក្នុងកម្រិតជាប្រភេទកីឡា កំពុងមានប្រជាប្រិយ មានចលនាសកម្មប៉ុណ្ណោះ គឺមិនមែនទទួលស្គាល់ ជាប្រភេទកីឡា ត្រូវដាក់ឱ្យលេង ក្នុងព្រឹត្តិការណ៍កីឡាប្រកួតថ្នាក់ពិភពលោករបស់ហ្គេមអូឡាំពិកអន្តរជាតិ នោះទេ»។
លោកបានបន្ថែមថា៖« IOC មានសមាជិកចំនួន ២០៥ ប្រទេស ហើយក្នុងកិច្ចប្រជុំ សម្រេចទទួលស្គាល់កីឡា Muaythai និង IFMA ព្រមទាំងប្រភេទកីឡាជាច្រើនទៀតនោះ គឺធ្វើឡើងក្នុងរង្វង់តែគណៈកម្មាធិការប្រតិបត្តិ ដែលមានសមាជិកត្រឹម ១០៥ ប្រទេស ខណៈ ១០០ ប្រទេសទៀត ក្នុងនោះមាន NOCC របស់យើងដែរ មិនត្រូវបានអញ្ជើញឱ្យចូលប្រជុំ បោះឆ្នោតទេ»។
បើទោះបីជា IOC ប្រកាសទទួលស្គាល់ Muay Thai ក្នុងកម្រិតត្រឹមជាប្រភេទកីឡា កំពុងមានប្រជាប្រិយ មានចលនាសកម្ម ដែលមិនទាន់មានសិទ្ធិជាកីឡាអូឡាំពិកអន្តរជាតិ ពេញលេង ប៉ុន្តែការប្រកាសនេះ វាបានក្លាយជាជោគជ័យដ៏ធំមួយរួចហើយ សម្រាប់ថៃ ហើយប្រទេសមួយនេះ នឹងព្យាយាមកៀកគរ ការគាំទ្របន្ថែមទៀត ដើម្បីអាចដាក់កីឡា Muay Thai ឱ្យមានការប្រកួត នៅអូឡាំពិក នាពេលអនាគត ដ៏ខ្លីខាងមុខនេះ ខណៈពេលនេះ Muay Thai មានប្រទេសជាសមាជិករហូតដល់ ១៤៥ ឯណោះ។
ផ្ទុយពីនេះ គុនខ្មែរ របស់កម្ពុជា ហាក់ដើរទៅមុខមិនរួចទេ ពោលគ្រាន់តែមានចម្រូងចម្រាស និងភាពមិនប្រក្រតី ដែលបានកើតមានឡើងជាង១០ឆ្នាំ នៅតាមសង្វៀនប្រដាល់ឯកជននោះ គឺថ្នាក់ដឹកនាំសហព័ន្ធកីឡាប្រដាល់គុនខ្មែរ នៅមិនទាន់លុបបំផុតបានផង ខណៈថ្មីៗនេះ លោកនាយករដ្ឋមន្រ្តី ហ៊ុន សែន ក៏បានរិះគន់ ទៅលើចំណាត់ការនេះ ហើយស្ថាប័ន NOCC និងក្រសួងអប់រំ យុវជន និងកីឡា ក៏បានធ្វើការព្រមាន ទៅដល់សហព័ន្ធនេះ ជុំវិញ ភាពអសកម្ម លើការលុបបំបាត់ភាពមិនប្រក្រតី ទៅលើលារបំពេញការងារនៃក្រុមមន្រ្តីបច្ចេកទេស របស់ខ្លួននេះផងដែរ៕