លោក Casey Barnett ដែលជាអនុប្រធានទី១របស់សហព័ន្ធកីឡាចំបាប់កម្ពុជា មានការរំពឹងថា ស្បែកជើងម៉ាកអាមេររិក ដែលលោកបានកាម៉ង់ទិញមកពីសហរដ្ឋអាមេរិកផ្ទាល់ នឹងក្លាយជាផ្នែកមួយយ៉ាងសំខាន់ ក្នុងការជួយឱ្យក្រុមចំបាប់កម្ពុជា មានការរីកចម្រើនទៅលើបច្ចេកទេស ទាំងការហ្វឹកហាត់ និងការប្រកួត នៅលើទីលាន ពិសេសការប្រកួតស៊ីហ្គេម នៅប្រទេសវៀតណាម ឆ្នាំ២០២១ ដែលបានលើកទៅធ្វើនៅដើមខែមេសា និងចុងខែឧសភា ឆ្នាំ២០២២ ខាងមុខនេះ។
សាស្រ្តាចារ្យផ្នែកគណនេយ្យ មកពីអាមរិក លោក ខេស៊ី បាណេត បានថ្លែងថា៖«ថ្ងៃនេះ ខ្ញុំបានប្រគល់ស្បែកជើងហ្វឹកហាត់ និងប្រកួត ទៅឱ្យក្រុមជម្រើសជាតិចំបាប់លម្ពុជា ចំនួន៣៧គូ ដែលស្បែកជើងនេះ ផលិតនៅប្រទេសអាមេរិក ជាម៉ាករបស់អាមេរិក គឺជាស្វែកជើងពិសេស ទាំងសម្រាប់ការហ្វឹកហាត់ និងការប្រកួត»។
លោក Casey ដែលធ្លាប់ជាអ្នកហ្វឹកហាត់កីឡាចំបាប់មួយរូបដែរនោះ បានប្រាប់បន្ថែមថា៖«ចំពោះផ្នែកកីឡាចំបាប់នេះ ចាំបាច់ត្រូវមានស្បែកជើងមានគុណភាពខ្ពស់បែបនេះ ទើបយើងអាចប្រើបច្ចេកទេស ក្នុងការចូលចាប់ និងបោកត្រឡប់ដៃគូបានល្អ ហេតុនេះយើងសង្ឃឹមថា ម៉ាកស្បែកជើង ដែលមានកីឡាករមួយចំនួន បានប្រើនៅក្នុងការប្រកួតអូឡាំពិក ទីក្រុងតូក្យូ ប្រទេសជប៉ុននោះ នឹងជួយឱ្យក្រុមអត្តពលិកចំបាប់កម្ពុជា មានបច្ចេកទេសកាន់តែល្អ»។
នាយកវិទ្យាស្ថានខេមអេដ លោក Casey Barnett កាលពីថ្ងៃចន្ទ ដើម្បីសប្តាហ៍នេះ បាននាំយកស្បែកជើងចំនួន៣៧គូ ដែលមានតម្លៃស្មើនឹង ៦០០០ដុល្លារ មកប្រគល់ជូនដោយលោក ធិន វិចិត្ត អគ្គលេខាធិការសហព័ន្ធកីឡាចំបាប់កម្ពុជា នៅទីតាំងវិទ្យាស្ថាន CamEd Business School តែម្តង ដើម្បីយកទៅប្រគល់ជូនដល់ក្រុមចំបាប់កម្ពុជា ដែលកំពុងមានការខ្វះខាតទៅលើសម្ភារហ្វឹកហាត់ ពិសេសគឺស្បែកជើងនេះតែម្តង ដែលលោក Casey អះអាងថា អ្នកខ្លះបានហ្វឹកហាត់ទាំងគ្មានស្បែកជើងពាក់។
អនុប្រធានសហព័ន្ធកីឡាចំបាប់កម្ពុជា លោក Casey បានបញ្ជាក់ថា៖ «ការឧបត្ថម្ភស្បែកជើងដល់ក្រុមចំបាប់នេះ ក៏ព្រោះតែស្បែកជើងចាស់របស់ពួកគាត់ បានរហែង ហើយអ្នកខ្លះ ក៏ហ្វឹកហាត់ ទាំងអត់មានស្បែកជើងផងដែរ អ៊ីចឹងខ្ញុំពិតជាសប្បាយរីករាយ ក្នុងការផ្តល់ជូនស្បែកជើងទាំងនេះ ជូនពួកគេ សម្រាប់បន្តការហ្វឹកហាត់ ដើម្បីឈានទៅរកការទទួលបានជោគជ័យ នៅក្នុងការប្រកួតស៊ីហ្គេម ឆ្នាំ២០២១ នៅប្រទេសវៀតណាម ដែលបានលើកយកទៅធ្វើនៅឆ្នាំ២០២២»។
វាមិនមែនជាលើកទី១នោះទេ ដែលលោក Casey Barnett បានជួយឧបត្ថម្ភដល់ក្រុមជម្រើសជាតិចំបាប់កម្ពុជា ព្រោះបុរសជនជាតិអាមេរិក ដែលមានចិត្តដិតដាមខ្លាំង ទៅនឹងកីឡាប្រពៃណីចំបាប់កម្ពុជា រូបនេះ តែងតែចូលរួមជួយដល់ក្រុមចំបាប់ និងក្លិបចំបាប់ នៅកម្ពុជា គឺលោកបានជួយទាំងសម្ភារ និងថវិកា ដែលគិតមកដល់ពេលនេះ លោកបានចំណាយសរុបអស់មិនក្រោម១០ម៉ឺនដុល្លារនោះទេ ហើយការជួយ ដោយគ្មានចង់បានផលចំណេញត្រឡប់ទៅវិញនេះ ក៏ព្រោះតែលោក Casey ចង់ឃើញ ក្រុមចំបាប់កម្ពុជា ទទួលបានជោគជ័យ ពិសេសការដណ្តើមបានមេដាយមាស ពីការប្រកួតនៅលើឆាកអន្តរជាតិជូនប្រទេសកម្ពុជា៕