អតីតខ្សែការពារដ៏ឆ្នើមរបស់ក្រុមជម្រើសជាតិកម្ពុជា រស់ សំអឿន ដែលស្ទើរតែលេងមានមុខ នៅលើទីលានប្រកួតនោះ បានធ្វើការប្តេជ្ញាថា នឹងខិតខំប្រឹងប្រែង ដើម្បីអភិវឌ្ឍ និងពង្រឹងសមត្ថភាព បន្ថែម ដើម្បីអាចប្រជែងបានកៅអី ឬជម្រើស១១នាក់ដំបូង នៅក្នុងក្រុមវិសាខា ឡើងវិញនោះ។
ការលើកឡើងរបស់ខ្សែការពារូបនេះ ត្រូវបានធ្វើឡើង បន្ទាប់ពីរូបគេបានបង្ហាញខ្លួនប្រមាណ១០នាទី បន្ទាប់ពីគ្រូបង្គោលជនជាតិអង់គ្លេស លោក Curtis Colum ដាក់ឱ្យចូលលេងនៅនាទីទី៨២ ជំនួយខ្សែការពារ ឆេង ម៉េង នៅពេលក្រុមវិសាខា បានយកឈ្នះលើក្រុមសិស្សប្អូន ដែលបានផ្តាច់ខ្លួនទៅលេងឱ្យក្រុមខេត្តព្រៃវែង ៣-២ កាលពីថ្ងៃអាទិត្យ ទី១ ខែសីហា ឆ្នាំ២០២១។
យ៉ាងណាក៏ដោយ រស់ សំអឿន ពិតជាមានការសប្បាយចិត្តខ្លាំង ដែលបានវិលចូលទៅកាន់ទីលានប្រកួតឡើងវិញនេះ។ តាមរយៈក្លិបវិសាខា រស់ សំអឿន បាននិយាយថា៖ «ខ្ញុំពិតជាសប្បាយរីករាយ ដែលបានត្រឡប់ចូលទីលានប្រកួត និងជួយក្រុមវិញ ទោះបីខ្ញុំ បានប្តូរចូលលេង នៅវគ្គទី២ ក៏ដោយ»។
គួររំឭលថា រស់ សំអឿន ជាលំដាប់ខ្សែការពារដ៏ឆ្នើមរបស់ក្រុមជម្រើសជាតិកម្ពុជា ដែលអាចរត់ពីតំបន់ការពារ ឡើងទៅជួយដល់តំបន់ប្រយុទ្ធ ហើយទម្រង់លេងរបស់គេ បានធ្វើឱ្យអ្នកគាំទ្រនៅកម្ពុជា មានការសរសើរ និងទុកចិត្តខ្លាំងបំផុត ទៅលើវត្តមានរបស់ សំអឿន នៅលើទីលាន ហើយកាលនោះ ជាមួយការចំណាយពេល៥ឆ្នាំ នៅក្លិបបឹងកេតពោលគឺចាប់ពីឆ្នាំ២០១៣ ដល់ឆ្នាំ២០១៧ រស់ សំអឿន ក៏បានជួយឱ្យក្លិបបឹងកេត លើកពានលីគកំពូលកម្ពុជា បានពីរលើក នៅឆ្នាំ២០១៦ និង២០១៧ ផងដែរ។
យ៉ាងណាក៏ដោយ ភាពល្បីល្បាញ និងប្រជាប្រិយភាពរបស់ រស់ សំអឿន បានធ្លាក់ជាបណ្តើរ បន្ទាប់ពីរូបគេ បានផ្លាស់ទ្រនំ ពីក្លិបបឹងកេត មកររួមរស់ជាមួយក្លិបវិសាខា នេះ កាលពីថ្ងៃទី១៤ ខែមករា ឆ្នាំ២០១៨ ហើយការធ្លាក់ចុះនេះ ដោយសារតែ រស់ សំអឿន បានជួយគ្រោះជាមួយការមានរបួស នៅលើទីលាន ជាបន្តបន្ទាប់ ធ្វើឱ្យរូបគេមានពេលមិនច្រើនទេ ក្នុងការចូលលេងនៅលើទីលាន។
យ៉ាងណាក៏ដោយ នៅពេលនេះ រស់ សំអឿន បានធ្វើការប្តេជ្ញាចិត្តថា នឹងខំប្រឹងប្រជែងយកកៅអីក្នុងជម្រើស១១នាក់ដំបូង នៅក្នុងក្រុមវិសាខា ឱ្យបានវិញ។ សំអឿន បានបញ្ជាក់ថា៖ «ខ្ញុំប្តេជ្ញានឹងខិតខំប្រឹងប្រែងហ្វឹកហាត់បន្ថែមទៀត ដើម្បីអភិវឌ្ឍសមត្ថភាពឱ្យកាន់តែល្អប្រសើរ និងឈានទៅទទួលបានកៅអី១១នាក់ដំបូងឡើងវិញ ជាពិសេសគ្រប់ការប្រកួតសេសសល់ ទាំងក្នុងលីគ និងពានរង្វាន់សម្តេចតេជោ ហ៊ុន សែន គឺខ្ញុំប្តេជ្ញានឹងខំប្រឹងប្រែងលេងឱ្យអស់ពីសមត្ថភាព ដើម្បីស្វែងរកលទ្ធផលល្អជូនក្លិប និងអ្នកគាំទ្ររបស់យើង»។
តែទោះបីជាយ៉ាងណា គេនៅមិនប្រាកដថា រស់ សំអឿន អាចធ្វើបានកម្រិតណា ដើម្បីសម្រេចក្តីស្រម៉ៃរបស់ខ្លួននោះទេ ព្រោះ វិសាខា ជាក្រុមប្រមូលផ្តុំដោយកីឡាករវ័យក្មេង ដែលមានសមត្ថភាពល្អៗ ហេតុនេះហើយការប្រកួតប្រជែង ដណ្តើមយកកៅអី១១នាក់ដំបូង នៅក្នុងក្រុមនេះ វានៅតែមានការពិបាក ដ្បិតអីកីឡាករល្អៗផ្សេងទៀត ដែលមានញ៉ាំញីដោយរបួសផងនោះ ក៏មិនបានជាប់ នៅក្នុងជម្រើស១១នាក់ដំបូងដែរ៕
