ខ្សែប្រយុទ្ធមានធំ Timothy Okereke ដែលបានបាត់មុខពីការប្រកួតលីគកំពូលកម្ពុជា ក្រោយបញ្ចប់កុងត្រាជាមួយក្រុមភ្នំពេញក្រោន នាចុងរដូវកាលឆ្នាំ២០២០នោះ នឹងត្រូវបង្ហាញវត្តមានជាថ្មី សម្រាប់ការប្រកួតជើងទី២ លីគកំពូលកម្ពុជា ឆ្នាំ២០២១នេះ ក្នុងនាមជាសមាជិកថ្មីរបស់ក្រុមកងយោធពលខេមរភូមិន្ទ (ទ័ព) ហើយ Timothy បានមើលឃើញថា រដូវកាលនេះ មានការប្រកួតប្រជែងខ្លាំងជាងមុន។
កីឡាករ Timothy បានចុះហត្ថលេខា ផ្ទេរមកកាន់ក្រុមកងយោធពលខេមរភូមិន្ទ កាលពីថ្ងៃចន្ទ ដោយកុងត្រានេះ មានសុពលភាពដល់ដាច់រដូវកាលឆ្នាំ២០២១ ហើយជាមួយការរកបានទ្រនំថ្មីនេះ Timothy បានអះអាងថា រូបគេបាន ព្យាយាមហ្វឹកហាត់រក្សាកាយសម្បទា និងកម្លាំងមិនឱ្យស្រកស្រុតនោះឡើយ បើទោះបីជារូបគេ បានខកខានប្រកួតអស់រយៈពេល៧ខែមកហើយក៏ដោយ។
សម្រាប់ការវិលមកកាន់ការប្រកួតលីគកំពូលកម្ពុជា ជាថ្មីនេះ Timothy បានប្រាប់ប្រព័ន្ធផ្សព្វផ្សាយថា៖ «ខ្ញុំពិតជារីករាយ ដែលបានត្រឡប់មកវិញ បន្ទាប់ពីមិនបានលេងរយៈពេល៧ខែមកនេះ ហើយក្ដីរំពឹង និងការតាំងចិត្តរបស់ខ្ញុំនៅតែដដែល ដោយក្នុងនោះ ការជួយក្រុមឱ្យទទួលបានជ័យជម្នះ ជាអាទិភាពរបស់ខ្ញុំ ព្រោះខ្ញុំបានព្យាយាមដាក់គោលការណ៍លើខ្លួនឯងបាន១០០ភាគរយហើយ សម្រាប់ការត្រឡប់មកវិញនេះ គឺខ្ញុំបានត្រៀមរួចរាល់ហើយ»។
ខ្សែប្រយុទ្ធនីហ្សេរីយ៉ាពាក់លេខ៩៩ រូបនេះ បានបបន្ថែមថា៖ «ខ្ញុំមើលឃើញថា ការប្រកួតលីគកំពូលកម្ពុជា រដូវកាលនេះ វាពិតជាល្អប្រសើរជាងមុន និងមានការប្រកួតប្រជែងខ្លាំងជាងមុន ព្រោះក្រុមទាំងអស់ សុទ្ធតែចង់ឈ្នះ មិនថា ស្ថានការណ៍បែបណានោះទេ ហើយចំណុចទាំងនេះហើយ ដែលធ្វើឱ្យការប្រកួតកាន់តែតានតឹង និងធ្វើឱ្យលីគ កាន់តែប្រសើរជាងមុន»។
គួររំឭកថា កីឡាករ Timothy បានឈានជើងមកប្រកបអាជីពបាល់ទាត់នៅកម្ពុជាក្នុងឆ្នាំ២០១៥ ដោយលេងនៅក្រុមស៊ីម៉ាក់យូណាយធីត ដល់ឆ្នាំ២០១៦ មុនផ្លាស់ទៅខេមបូឌានថាយហ្គឺរ ឆ្នាំ២០១៧។ លេងនៅក្រុមខេមបូឌានថាយហ្គឺរ បានមួយរដូវកាល កីឡាករវ័យ២៧ឆ្នាំរូបនេះ បានទៅប្តូរទៅឱ្យក្រុមអាស៊ីអឺរ៉ុបយូណាយធីត រដូវកាលឆ្នាំ២០១៨។
លេងនៅក្រុមអាស៊ីអឺរ៉ុប បានត្រឹមជើងទី១ Tomothy បានបន្តផ្ទេរទៅលេងនៅក្លិប UiTM ដែលកាលណោះ នៅក្របខណ្ឌទី២ ម៉ាឡេស៊ី ជុំទី២ ឆ្នាំ២០១៨ ប៉ុន្តែនៅឆ្នាំ២០១៩ ខ្សែប្រយុទ្ធមានធំរូបនេះ បានវិលត្រឡប់មកកម្ពុជាវិញ និងបានចូលរួមជាមួយក្រុមអង្គរថាយហ្គឺរ ម្ដងទៀត ហើយនៅឆ្នាំ២០២០ រូបគេក៏បានផ្ទេរទៅក្រុមភ្នំពេញក្រោន និងរកបាន១២គ្រាប់ ក្នុងការបង្ហាញខ្លួនពេញមួយរដូវកាលនោះ៕
