វីរៈកីឡាការិនីជឺជិតស៊ូ នៃក្រុមជម្រើសជាតិកម្ពុជា ខាន់ ចេសា នឹងត្រូវប្រឈមការប្រកួតដ៏លំបាក ក្នុងព្រឹត្តិការណ៍កម្រិតពិភពលោក គឺការប្រកួតកីឡាជឺជិតស៊ូ ដណ្ដើមខ្សែក្រវាត់ WNO Strawweight Champion អមជាមួយប្រាក់រង្វាន់ ៣ម៉ឺនដុល្លារ ដែលកម្ពុជានេះ នឹងត្រូវធ្វើនៅលើសង្វៀន “Who’s Number One ឬនរណាលេខ១” នៅសហរដ្ឋអាមេរិក។
បើទោះបីជា ខាន់ ចេសា មានសមត្ថភាពខ្លាំង ផ្នែកកីឡាជឺជិតស៊ូ ដោយធ្លាប់ដណ្តើមបានមេដាយមាស និងពានលេខ១ នៅក្នុងការប្រកួតជើងឯកពិភពលោក ហើយក៏បានឈ្នះមេដាយមាស ពីការប្រកួតកីឡាអាស៊ី ដើម្បីចាប់ងារជាវីរកីឡាការិនីរបស់កម្ពុជា ប៉ុន្តែសម្រាប់ការប្រកួតដណ្តើមខ្សែក្រវាត់ លើប្រភេទទម្ងន់ ១១៥ផោន ឬជាង ៥២គីឡូក្រាមនេះ គឺគណៈកម្មការ បានសម្រិតសម្រាំងយកសុទ្ធតែជើងខ្លាំងលំដាប់កំពូលចំនួន៨នាក់ មកប្រកួតប្រជែងគ្នា។
នៅក្នុងចំណោមបេក្ខភាពទាំង៨នាក់ ដែលគណៈកម្មការ បានសម្រិតសម្រាំង និងជ្រើសរើសមកប្រកួត ដណ្តើមខ្សែក្រវាត់ WNO Strawweight Champion នេះ កីឡការិនីប្រេស៊ីល Mayssa Bastos បានក្លាយជាឧបសគ្គយ៉ាងធំ សម្រាប់ ខាន់ ចេសា ព្រោះកីឡាការិនីដែលមានចំណាត់លេខ១ លើពិភពលោក លើប្រភេទទម្ងន់ជាង៥២គីឡូក្រាមរូបនេះ ធ្លាប់បានឈ្នះ ខាន់ ចេសា របស់កម្ពុជា ចំនួន២ដងមកហើយ កាលពីដើមខែមេសា និងពាក់កណ្ដាលខែឧសភាកន្លងទៅ។ នេះបើយោងតាមរបាយការណ៍ WNO។
ជាមួយគ្នានេះ កីឡាការិនីចិន Grace Gundrum ដែលឈរលេខរៀងទី២ កម្រិតពិភពលោក បន្ទាប់ពី Mayssa Bastos ក៏បានក្លាយជាឧបសគ្គធំ ចំពោះ ខាន់ ចេសា ផងដែរ ខណៈអ្នកទាំង២នេះ ធ្លាប់ត្រូវបានផ្គូរផ្គងឱ្យជួបគ្នា ក្នុងកម្មវិធី WNO នេះ កាលពីចុងខែមេសា ម្តងហើយ ប៉ុន្តែត្រូវបានលុបចោលវិញ ដោយសារពេលនោះកីឡាការិនីចំណាត់ថ្នាក់លេខ៣ពិភពលោក ក្នុងទម្ងន់ជាង៥២គីឡូក្រាម ខាន់ ចេសា បានដកខ្លួន ព្រោះមានបញ្ហារបួស។
ចំណែកបេក្ខភាពបន្ទាប់ គឺកីឡាការិនីអាមេរិក Daniele Kelly ដែលមានចំណាត់ថ្នាក់លេខ៦ លើពិភពលោក ក្នុងប្រភេទទម្ងន់ ៥៦,៧ គីឡូក្រាម ប៉ុន្តែជើងខ្លាំងម្នាក់នេះ ធ្លាប់បានចាញ់ ខាន់ ចេសា ម្តងហើយ កាលពីចុងខែកុម្ភៈកន្លងទៅ។ រីឯបេក្ខភាព៤នាក់ទៀតមាន កីឡាការិនីអាមេរិក Amanda “Tubby” Alequin ឈរចំណាត់ថ្នាក់ប្រភេទទម្ងន់ Flyweigh (៥៦,៧ គីឡូក្រាម) កីឡាការិនី Jessica Crane ឈរនៅលេខ៧ លើលោក ប្រភេទទម្ងន់ជាង៥២គីឡូក្រាម កីឡាការិនី Alex Nguye ឈរនៅលេខ៩ ក្នុងប្រភេទទម្ងន់ជាង៥២គីឡូក្រាម និងកីឡាការិនី Tammi Musumeci ដែលអ្នកទាំង៤នេះ សុទ្ធតែជាអត្តពលិករបស់សហរដ្ឋអាមេរិកដូចគ្នា។
យ៉ាងណាក៏ដោយ ដោយសារការប្រកួតដណ្តើមខ្សែក្រវាត់នេះ នឹងត្រូវធ្វើ នៅថ្ងៃទី២៥ និងទី២៦ ខែកញ្ញា ឆ្នាំ០២១ ហេតុនេះ ម្ចាស់មេដាយមាសកីឡាអាស៊ី ឆ្នាំ២០១៨ និងជាម្ចាស់មេដាយមាសស៊ីហ្គេម ឆ្នាំ២០១៩ ខាន់ ចេសា នៅមានពេលវេលាច្រើនទៀត ដើម្បីហ្វឹកហាត់ពង្រឹងសមត្ថភាពបន្ថែម ខណៈការបង្ហាញខ្លួនកន្លងមក កីឡាការិនីកូនកាត់ ៣សាសន៍កម្ពុជា-ម៉ិកស៊ិក-អាមេរិក ខាន់ ចេសា តែងតែធ្វើបានល្អ និងដណ្តើមបានជោគជ័យ ជាបន្តបន្ទាប់ ជាមួយការប្រកួតដ៏ប៉ិនប្រសព្វរបស់ខ្លួន៕