នៅទីបំផុត ក្រុមហុងកុង បានក្លាយជាបេក្ខភាព ដែលត្រូវចូលទៅលេង នៅក្នុងពូលK ជាមួយក្រុមជម្រើសជាតិអាយុក្រោម២៣ឆ្នាំរបស់កម្ពុជា និងក្រុមម្ចាស់ផ្ទះជប៉ុន នៅក្នុងការប្រកួតវគ្គជម្រុះ នៃពានរង្វាន់បាល់ទាត់ទ្វីបអាស៊ីអាយុក្រោម២៣ឆ្នាំ (AFC U23 ASIAN CUP UZBEKISTAN 2022)។
លទ្ធផលនេះ បានកើតមានឡើង បន្ទាប់ពីក្រុមហុងកុង បានឈ្នះនៅក្នុងការបោះឆ្នោត
ក្នុងចំណោមក្រុមទាំង៨ ដែលត្រូវបានរៀបចំឡើងដោយ សហព័ន្ធបាល់ទាត់ទ្វីបអាស៊ី (AFC) នៅទីស្នាក់ការរបស់ AFC ក្នុងទីក្រុងគូឡាឡាំពួ កាលពីរសៀលម៉ោង២ ថ្ងៃពុធនេះ។
តាមរយៈលទ្ធផលនៃការបោះឆ្នោតនេះ ក្រុមហុងកុង ដែលដំបូងឡើយ ឈរនៅពូល I នោះ នឹងក្លាយជាបេក្ខភាព ដែលត្រូវប្រកួតប្រជែង នៅក្នុងពូល K ជាមួយក្រុមកម្ពុជា និង ម្ចាស់ផ្ទះជប៉ុន វិញម្តង ចំណែកក្រុមU23របស់ចិន ក្រុមប្រ៊ុយណេ ក្រុមទីម័រខាងកើត ហ្វីលីពីន មីយ៉ាន់ម៉ា ម៉ាឡេស៊ី និងក្រុមU23របស់ឡាវ ដែលមិនទទួលបានគ្រាប់ឆ្នោត នៅក្នុងការបោះឆ្នោតនេះ ត្រូវដាក់ឱ្យលេងនៅតាមពូលចាស់រៀងៗខ្លួនវិញ ព្រោះការបោះឆ្នោតនេះ កំណត់យកតែ១ក្រុមគត់៕
