កីឡាករជម្រើសជាតិកីឡាប្រដាល់សកលកម្ពុជាចំនួន៣នាក់ នឹងត្រូវចេញទៅហ្វឹកហាត់រយៈពេល៣ខែ នៅប្រទេសបារំាង ដើម្បីពង្រឹងសមត្ថភាពកាន់តែប្រសើរ ត្រៀមឆ្ពោះទៅប្រជែងរកមេដាយ នៅក្នុងការប្រកួតកីឡាស៊ីហ្គេម លើកទី៣១ ឆ្នាំ២០២១ នៅប្រទេសវៀតណាម ដែលបានពន្យារពេលទៅរៀបចំ ចុងខែមេសា ដល់ដើមខែឧសភា ឆ្នាំ២០២២។
ក្រុមអត្តពលិកជម្រើសជាតិទាំង៣នាក់ ដែលត្រូវបានជ្រើសរើសឱ្យទៅហ្វឹកហាត់ នៅប្រទេសបារាំងនេះ រួមមាន កីឡាករវ័យ២១ឆ្នាំ សៅ រង្សី ដែលស្ថិតនៅក្នុងប្រភេទទម្ងន់ ៥២គីឡូក្រាម កីឡាករអាយុ២៣ឆ្នាំ ទម្ងន់៦៤គីឡូក្រាម សែត សារឹទ្ធ និងកីឡាករទម្ងន់៦៩គីឡូក្រាម វី សុភ័ស ដែលមានអាយុ ២១ឆ្នាំ។
បើតាមអគ្គលេខាធិការសហព័ន្ធកីឡាប្រដាល់សកលកម្ពុជា លោក ប៊ុយ សុភ័ណ្ឌ បានប្រាប់ថា ការគ្រោងបញ្ជូនកីឡាករទាំង៣នាក់ខាងលើ ទៅហ្វឹកហាត់នៅប្រទេសបារាំងនេះ គឺបន្ទាប់គម្រោងចាស់ ត្រូវបានអាកខាន។ លោកថា៖ «តាមពិត គម្រោងនេះ ត្រូវចេញដំណើរនាថ្ងៃទី១៣ ខែសីហា ឆ្នាំ២០២១នេះ ប៉ុន្តែដោយសារការស្នើសុំទិដ្ឋាការពីស្ថានទូតបារំាងមិនទាន់បាន ដូច្នេះទើបយើងពន្យារពេល ចេញទៅ នៅចុងខែសីហានេះ ឬខែកញ្ញាខាងមុខវិញ»។
សម្រាប់ការហ្វឹកហាត់រយៈពេល៣ខែ នៅប្រទេសបារាំងនេះ គឺគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) ជាអ្នកចំណាយទៅលើថ្លៃសំបុត្រយន្តហោះ ការហូបចុក និងការស្នាក់នៅ ក្នុងកំលុងពេលហ្វឹកហាត់នោះ ចំណែកប្រាក់ឧបត្ថម្ភប្រចាំខែ ទទួលបានការឧបត្ថម្ភគាំទ្រពីក្រសួងអប់រំ យុវជន និងកីឡា។ នេះបើតាមការឱ្យដឹងរបស់ លោក ប៊ុយ សុភ័ណ្ឌ។
គួររំឭកថា តាមរយៈការចូលប្រកួតប្រជែង នៅស៊ីហ្គេម ចំនួន៣ទៅ៤លើកចុងក្រោយនេះ ក្រុមប្រដាល់សកលកម្ពុជា តែងតែដណ្តើមបានមេដាយ ជូនជាតិជាបន្តបន្ទាប់ ហើយការប្រកួតស៊ីហ្គេម លើកចុងក្រោយ នៅហ្វីលីពីន កាលពីឆ្នាំ២០១៩ កន្លងមកនេះ ក្រុមប្រដាល់សកល ដណ្តើមបានមេដាយសំរឹទ្ធចំនួន៥។ ចំណែកការត្រៀមចេញទៅហ្វឹកហាត់ នៅបារាំង ក្នុងពេលខាងមុខនេះ វាក៏ជាយុទ្ធសាស្ត្រ ដើម្បីរក្សាការប្រជែងឱ្យបានមេដាយ នៅស៊ីហ្គេម ក្នុងប្រទេសវៀតណាម ផងដែរ។
លោក ប៊ុយ សុភ័ណ្ឌ បានបន្ថែមថា៖ «នៅក្នុងអំឡុងពេលហ្វឹកហាត់នោះ កីឡាកររបស់យើង ក៏មានឱកាសបានចូលរួមប្រកួតប្រដាល់សកលលក្ខណៈអាជីពរបស់ប្រទេសបារំាងផងដែរ អ៊ីចឹងវានឹងជួយជំរុញដល់គុណភាពបច្ចេកទេស និងបង្កើនបច្ចេកទេសកាន់តែរឹងមាំ សម្រាប់កីឡាករទាំង៣នាក់នេះ ក្នុងគោលដៅឆ្ពោះទៅប្រជែងរកមេដាយ ក្នុងស៊ីហ្គេម នៅប្រទេសវៀតណាម ដែលបានលើកពីឆ្នាំ២០២១នេះ ទៅធ្វើ នៅឆ្នាំ២០២២»៕
