សហព័ន្ធកីឡាប៊ូល និងប៉េតង់កម្ពុជា នឹងធ្វើការបោះឆ្នោតជ្រើសរើសថ្នាក់ដឹកនាំ ឬគណៈកម្មាធិការប្រតិបត្តិ សម្រាប់អាណត្តិថ្មី នៅព្រឹកថ្ងៃសុក្រស្អែកនេះ បន្ទាប់ពីការបំពេញការងាររបស់គណៈកម្មាធិការប្រតិបត្តិអាណត្តិទី៦ បានផុតសុពលភាព តាំងពីឆ្នាំ២០២០នោះ។
សម្រាប់ការបោះឆ្នោតជ្រើសរើសថ្នាក់ដឹកនាំថ្មី សម្រាប់អាណត្តិថ្មី ឆ្នាំ២០២១ ដល់ឆ្នាំ២០២៥នេះ នឹងត្រូវបានធ្វើឡើង ក្រោមអធិបតីភាពរបស់ លោក ស សុខា រដ្ឋលេខាធិការក្រសួងអប់រំ យុវជន និងកីឡា តែម្តង ហើយភាគីពាក់ព័ន្ធមួយចំនួនទៀត ក៏នឹងត្រូវចូលរួម នៅក្នុងមហាសន្និបាទ ស្អែកនេះផងដែរ។
មន្តីព័ត៌មានរបស់ សហព័ន្ធកីឡាប៊ូល និងប៉េតង់កម្ពុជា បានប្រាប់ថា ៖ «សហព័ន្ធកីឡាប៊ូល និងប៉េតង់កម្ពុជា នឹងរៀបចំ មហាសន្និបាតបញ្ចប់អាណត្តិទី៦ និងការបោះឆ្នោតជ្រើសរើសគណៈកម្មាធិការប្រតិបត្តិអាណត្តិទី៧ ឆ្នាំ២០២១ – ២០២៥ ក្រោមអធិបតីភាពរបស់ ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា និងជាប្រធានសហព័ន្ធកីឡាប៊ូល និងប៉េតង់កម្ពុជា នៅថ្ងៃទី១៣ ខែសីហា ឆ្នាំ២០២១ វេលាម៉ោង ៨ព្រឹក តាមរយៈប្រព័ន្ធ Zoom»។
មន្រ្តីព័ត៌មានដដែលនេះ បានបន្ថែមថា៖ «សម្រាប់សមាសភាពចូលរួម នៅក្នុងមហាសន្និបាត តាមរយៈប្រព័ន្ធ Zom នេះ រួមមានសមាជិកគណៈកម្មាធិការប្រតិបត្តិ ទីប្រឹក្សាសហព័ន្ធ តំណាងក្រសួងអប់រំ យុវជន និងកីឡា តំណាង គណៈកម្មាធិការជាតិអូឡាំពិកកម្ពុជា ព្រមទាំងសម្ព័ន្ធ ក្លិបកីឡាប៊ូល និងប៉េតង់រាជធានី-ខេត្ត ដែលជាសមាជិករបស់សហព័ន្ធ»។
បើទោះបីជាលទ្ធផលការបោះឆ្នោតជ្រើសរើសថ្នាក់ដឹកនាំអាណត្តិថ្មី នៅមិនទាន់បានបង្ហាញ ប៉ុន្តែសម្រាប់តួនាទីជាប្រធានសហព័ន្ធកីឡាប៊ូល និងប៉េតង់កម្ពុជា ត្រូវបានគេគិតថា នឹងនៅតែលោក ស សុខា ព្រោះសម្រាប់ការដឹកនាំក្នុងអាណត្តិចាស់កន្លងមកនេះ លោក ស សុខា បង្កើតបានស្នាដៃល្អៗជាច្រើន ពិសេសលោកជាប្រធានសហព័ន្ធ ដំបូងគេ ដែលបានរៀបចំឱ្យមានការប្រកួតកីឡាប៉េង់ជ្រើសរើសជើងឯកពិភពលោក នៅកម្ពុជា ហើយបានបញ្ចប់ដោយជោគជ័យ។
បន្ថែមលើនេះ លោក ស សុខា ជាប្រធានសហព័ន្ធ ដែលតែងតែចូលរួមជួយដោះស្រាយនៅរាល់បញ្ហា ដែលបានកើតមានឡើងចំពោះសហព័ន្ធកីឡាប៊ូល និងប៉េតង់កម្ពុជា ហើយលោកទទួលបានការគាំទ្រខ្លាំង នៅក្នុងចង្រោមគ្រួសារប៉េតង់ និងត្រូវបានគេចាត់ទុកថា «ជាមេល្អ» ហេតុនេះ លោក ស សុខា នឹងអាចត្រូវបានគេបោះឆ្នោត ឬជ្រើសរើសឱ្យធ្វើជាប្រធានសហព័ន្ធនេះ បន្តទៀត៕