បរទេស៖ ខ្សែប្រយុទ្ធ Robert Lewandowski បានស៊ុតបាល់បញ្ចូលទី២គ្រាប់ ខណៈដែលពួកគេ Bayern Munich បានការពារពាន German Super Cup យ៉ាងជោគជ័យ តាមរយៈការដណ្តើមបានជ័យជម្នះក្នុងលទ្ធផល ៣-១ នៅលើទឹកដីក្រុម Borussia Dortmund កាលពីថ្ងៃអង្គារ ក្នុងការប្រកួតគ្នាដ៏ស្វិតស្វាញ។
Lewandowski បានជួយឲ្យក្រុម Bayern រកបានគ្រាប់បាល់នាំមុខមុន តាមរយៈការតែតបាល់បញ្ចូលទីយ៉ាងល្អនៅកីឡដ្ឋាន Signal Iduna Park នៅមុនពេល Thomas Mueller បានបន្ថែមគ្រាប់បាល់នាំមុខរបស់ក្រុមភ្ញៀវ ដើម្បីជួយឲ្យពួកគេនាំមុខ ២-០ បន្ទាប់ពីសម្រាកតង់ទី១។ ខ្សែប្រយុទ្ធ Marco Reus ប្រធានក្រុមនៃក្រុម Dortmund បានវាយបក១គ្រាប់វិញ នៅពេលដែលរូបគេបានស៊ុតបាល់កោងចូលទីយ៉ាងល្អ នៅមុនពេល Lewandowski បំពេញជ័យជម្នះក្នុងការប្រកួតនេះតែម្តង។ បច្ចុប្បន្ន កីឡាករវ័យ៣២ឆ្នាំរូបនេះ បានស៊ុតបាល់បញ្ចូលទី៣២គ្រាប់ហើយពេលប្រកួតជាមួយនឹងក្រុម Dortmund ដែលជាកន្លែងរូបគេធ្លាប់បានលេងឲ្យចាប់ពីឆ្នាំ២០១០ ដល់ឆ្នាំ២០១៤។ បច្ចុប្បន្ន Bayern បានឈ្នះរាល់ការប្រកួតទាំង៦លើកចុងក្រោយជាមួយនឹងក្រុម Dortmund។
នេះគឺជាជ័យជម្នះដ៏កក់ក្តៅមួយសម្រាប់ក្រុម Bayern ដែលមិនស្គាល់ឈ្នះសោះក្នុងការប្រកួតមិត្តភាព៤លើករបស់ខ្លួន នៅមុនពេលបានបញ្ចប់ក្នុងលទ្ធផលស្មើក្នុងការប្រកួតបើករដូវកាលថ្មីនៃក្របខ័ណ្ឌ Bundesliga ជាមួយនឹងក្រុម Borussia Moenchengladbach កាលពីថ្ងៃសុក្រ៕
ប្រភពព័ត៌មាន៖ Channel News Asia
