បរទេស៖ ក្លិបកាំភ្លើងធំ Arsenal កំពុងតែស្ថិតយ៉ាងប្រកៀកក្នុងការនាំយកអ្នកចាំទី Aaron Ramsdale ពីក្លិប Sheffield United ក្នុងតម្លៃខ្លួន៣០លានផោន (ស្មើនឹង៤១លានដុល្លារអាមេរិក)។
កីឡាករវ័យ២៣ឆ្នាំរូបនេះ ដែលបានជាប់ជាសមាជិកក្នុងក្រុមបាល់ទាត់ជម្រើសជាតិអង់គ្លេសរបស់លោក Gareth Southgate នាព្រឹត្តិការណ៍ Euro ឆ្នាំ២០២០ នោះ ត្រូវបានរំពឹងទុកថា នឹងត្រូវប្រកួតប្រជែងជាមួយនឹងអ្នកចាំទី Bernd Leno ហើយគឺជាអ្នកចាំទីជម្រើសទី១របស់លោក Mikel Arteta នារដូវក្តៅនេះ។ ការផ្ទេរសម្រាប់ Ramsdale មានតម្លៃខ្លួនជាគោលចំនួន២៦លានផោន ដោយបូកបន្ថែមប្រាក់ឧបត្ថម្ភនានាចំនួន៦លានផោនផ្សេងទៀត។ លោក Arteta ត្រូវបានគេយល់ឃើញថា ចង់បន្ថែមកីឡាករវ័យក្មេងដែលមានសមត្ថភាព ដើម្បីអភិវឌ្ឍក្រុមរបស់លោក។
ក្រុម Arsenal បាននាំយកខ្សែការពារ Ben White រួចជាស្រេចសម្រាប់តម្លៃខ្លួន៥០លានផោន ពីក្លិប Brighton ខណៈដែលការនាំយកខ្សែបម្រើអន្តរជាតិន័រវែស Martin Ødegaard ក៏ត្រូវបានរំពឹងទុកថា កំពុងតែដំណើរការផងដែរ។ ក្លិប Bournemouth នឹងទទួលបានប្រាក់ចំណេញចំនួន១៥% ក្រោយពីបានបញ្ចូលលក្ខខណ្ឌនេះ ក្នុងពេលពួកគេបានលក់អ្នកចាំទីរូបនេះ ទៅឲ្យក្លិប Sheffield United ក្នុងតម្លៃខ្លួន១៨,៥លានផោន កាលពីឆ្នាំមុន៕
ប្រភពព័ត៌មាន៖ The Guardian
