ខ្សែប្រយុទ្ធ Abee Adjoo ដែលជាអ្នកសម្លាប់ដ៏សំខាន់របស់ក្លិបបាល់ទាត់អាស៊ីអឺរ៉ុប ត្រូវបានផ្ទេចទៅកាន់ក្លិបបឹងកេត ជាផ្លូវការហើយ ប៉ុន្តែជាមួយគ្នានេះ ខ្សែប្រយុទ្ធធ្លាប់មានឈ្មោះល្បី និងធ្លាប់លេងបានច្រើនក្លិប Shane Booysen បានធ្លាក់ខ្លួន និងក្លាយជាកីឡាករ ដែលរកទីជម្រក សម្រាប់ការវិលមកកាន់ទីលានឡើងវិញ មិនទាន់បាន បន្ទាប់ពីស្ថានភាពជំងឺ បានប្រសើរ។
ការផ្ទេរខ្សែប្រយុទ្ធពាក់លេខ៩ Abee Adjoo ទៅកាន់ក្លិបបឹងកេត ត្រូវបានក្លិបអាស៊ីអឺរ៉ុប ប្រកាសនៅលើផេចហ្វេសប៊ុករបស់ខ្លួន នៅថ្ងៃពហស្បតិ៍នេះ ហេតុនេះមានន័យថាកីឡាករជនជាតិកាមេរូន ដែលកំពុងឈរនៅលេខ២ ក្នុងនាមជាអ្នកទាត់បាល់បញ្ចូលទីបានច្រើនជាងគេ (១០គ្រាប់) រូបនេះ នឹងត្រូវបន្តអាជីពរបស់ខ្លួន ជាមួយក្លិបបឹងកេត ដោយរូបគេ នឹងត្រូវចូលលេង នៅជុំទី២ នៃការប្រកួតលីគកំពូលកម្ពុជា ឆ្នាំ២០២១។
ផ្ទុយពីនេះ ខ្សែប្រយុទ្ធមកពីអាហ្វ្រិកខាងត្បូង Shane Booysen ដែលធ្លាប់លេងនៅក្លិបភ្នំពេញក្រោន ព្រះខ័នរាជស្វាយរៀង និងណាហ្គាវើលដ៍ នោះ កំពុងក្លាយជាកីឡាករគ្មានក្លិបលេង នៅលីគកំពូលកម្ពុជា បន្ទាប់ពីរូបគេត្រូវបានក្លិបនគរបាលជាតិ បញ្ចប់កុងត្រា មុនការកំណត់។
ខ្សែប្រយុទ្ធ ដែលធ្លាប់បានសាងភាពល្បីល្បាញខ្លាំង នៅក្លិបភ្នំពេញក្រោន Booysen ពិតជាមានបំណងចង់វិលត្រឡប់មកកាន់ទីលានប្រកួតជាថ្មី បន្ទាប់ពីរបួសជំងឺស្ទះសរសៃឈាមខួរក្បាលរបស់គេ មានភាពប្រសើរវិញ។ Booysen បានប្រាប់ប្រព័ន្ធផ្សព្វផ្សាយក្នុងស្រុកថា៖«ជំងឺរបស់ខ្ញុំជាហើយ វាមិនធ្ងន់ធ្ងរទេ វាមានរយៈពេលបួនខែហើយ ដូច្នេះខ្ញុំបានត្រៀមខ្លួនរួចរាល់ហើយ ដើម្បីបានលេងម្ដងទៀត»។
តែទោះបីជាយ៉ាងណា គិតមកដល់ពេលនេះ Booyen នៅមិនទាន់រកបានទ្រនំថ្មី នៅឡើយទេ ខណៈខ្សែប្រយុទ្ធរូបនេះ មានបទពិសោធប្រកួតច្រើន នៅលីកកំពូលកម្ពុជា ដោយរូបគេរកបានគ្រប់បាល់សរុបចំនួន៧៣គ្រាប់ សម្រាប់ការលេងឱ្យក្លិបចំនួន៤ផ្សេងៗពីគ្នា។
កីឡាករ Shane Booysen បានចាប់អាជីពបាល់ទាត់ជាលើកដំបូង នៅឆ្នាំ២០១៥ ពេលរូបគេចុះកុងត្រាលេងឱ្យក្លិបភ្នំពេញក្រោន ហើយការបង្ហាញខ្លួនចំនួន៤១ដង ក្នុងនាមជាកីឡាករសិង្ហក្រហម ពីឆ្នាំ២០១៥ ដល់ឆ្នាំ២០១៧នោះ Booysen រកបាន៤១គ្រាប់ មុនពេលរូបគេ ផ្លាស់ទៅរួមរស់ជាមួយក្រុមព្រះខ័នរាជស្វាយរៀង នៅឆ្នាំ២០១៨ ដោយរកបាន៧គ្រាប់ ក្នុងការបង្ហាញខ្លួនចំនួន១០ដង។
នៅឆ្នាំ២០១៩ Booysen បានលេងឱ្យក្លិបនគរបាល់ជាតិ ចំនួន១០ប្រកួត ដោយរកបាន១០គ្រាប់ ហើយនៅជើងទី២ ក្នុងឆ្នាំដដែលនេះ រូបគេបានវិលមកលេងឱ្យក្លិបភ្នំពេញក្រោន ជាថ្មី ដោយលេងបាន១២ដង រកបាន៨គ្រាប់។ ប៉ុន្តែនៅឆ្នាំ២០២០ Booysen បានប្តូរមកលេងឱ្យ ក្រុមណាហ្គាវើលដ៏ ដោយលេងបាន១៤ដង រកបានត្រឹម៥គ្រាប់។
ចំណែកនៅដើមឆ្នាំ២០២១នេះ រូបគេបានវិលមកលេងឱ្យក្រុមនគរបាលជាតិវិញ តែលេងបានត្រឹម២លើក និងរកបាន២គ្រាប់ Booysen បានជួបហេតុការណ៍អាក្រក់ ដោយរូបគេ ត្រូវបានពិនិត្យឃើញថា មានជំងឺស្ទះសរសៃឈាមខួរក្បាល និងបានចូលសម្រាកព្យាបាលនៅមន្ទីរពេទ្យ តាំងពីដើមខែមេសា ហើយក៏ជាពេលរូបគេ បានឃ្លាតឆ្ងាយពីបាល់ទាត់រហូតមកដល់ពេលនេះផងដែរ ក្រោយក្លិបនគរបាលជាតិ បានបញ្ចប់កុងត្រាជាមួយរូបគេ មុនពេលកាលកំណត់នោះ៕