ក្លិបមានមូលដ្ឋាននៅខេត្តស្វាយរៀង ព្រះខ័នរាជស្វាយរៀង បានប្រកាសជាផ្លូវការ ក្នុងការនាំយកកីឡាករជនជាតិកាមេរូន ម្នាក់ទៀត គឺខ្សែបម្រើ Emmanuel Mbarga មកជួយដល់ក្រុម សម្រាប់ត្រៀមការប្រកួតជើងទី២ នៃលីគកំពូលកម្ពុជា ឆ្នាំ២០២១ នាពេលខាងមុខនេះ។
ការប្រកាសពីការចុះកុងត្រាជាមួយខ្សែបម្រើវ័យ២២ឆ្នាំ Emmanuel Mbarga ត្រូវបានធ្វើឡើង កាលពីថ្ងៃអាទិត្យ គឺតែប៉ុន្មានថ្ងៃ ដែលក្លិបព្រះខ័នរាជស្វាយរៀង បានប្រកាសចែកផ្លូវជាលើកទី២ ជាមួយខ្សែប្រយុទ្ធជនជាតិប្រេស៊ីល Thiago de Jesus អ៊ីចឹងមានន័យថា Emmanuel Mbarga នឹងចូលមកជំនួយទីតាំងរបស់ Thiago សម្រាប់ត្រៀមការប្រកួតជើងទី២។
យ៉ាងណាក៏ដោយ ព្រះខ័នរាជស្វាយរៀង នៅមិនទាន់បានបង្ហាញពីប្រវត្តិ និងបទពិសោធប្រកួតរបស់ Emmanuel Mbarga នៅឡើយទេ ប៉ុន្តែបើតាមព័ត៌មាន ដែលទទួលបាន ពីការស្រាវជ្រាវ នៅលើអ៊ិនធើណេត បានបង្ហាញថា Emmanuel Mbarga មានបទពិសោធជោគជាំ សម្រាប់ការប្រកបអាជីពបាល់ទាត់ នៅប្រទេសព័រទុយហ្គាល់។
ចាប់តាំងពីឆ្នាំ២០១៦ ដល់ឆ្នាំ២០២០ Emmanuel Mbarga បានលេខឱ្យក្លិបចំនួន៣ នៅព័រទុយហ្គាល់ គឺក្លិប Condiexa ពីឆ្នាំ២០១៦ ដល់ឆ្នាំ២០១៨ រួចបន្តផ្លាស់ប្តូរមកក្លិប Varzim B ពីឆ្នាំ២០១៨ ដល់ឆ្នាំ២០១៩ និងបន្តមកនៅក្លិប Agueda ពីឆ្នាំ២០១៩ ដល់ឆ្នាំ២០២០ ហើយចុងក្រោយបានប្តូរមកលេងនៅក្លិប Tours នៅប្រទេសបារាំង មុនពេលផ្ទេរមកាន់ក្លិបព្រះខ័នរាជស្វាយរៀង នៅពេលនេះ។
តាមការប្រកាសរបស់ក្លិបព្រះខ័នរាជស្វាយរៀង បានឱ្យដឹងថា Emmanuel Mbarga បានចាប់ហ្វឹកហាត់ជាផ្លូវការ កាលពីថ្ងៃអាទិត្យ គឺហ្វឹកហាត់ជាមួយគ្រូបង្វឹកជនជាតិអៀរឡង់ លោក Connor Nestor និងមិត្តរួមជាតិរបស់គេ Privat ដែលជាខ្សែប្រយុទ្ធដ៏លេចធ្លោ ប្រចាំនៅក្លិបនេះ ហើយក៏កំពុងឈរនៅកំពូលតារាង ក្នុងនាមជាអ្នករកបានគ្រាប់បាល់ច្រើនជាងគេ (១១គ្រាប់) ជាបណ្តោះអាសន្ន នៅលីគកំពូលកម្ពុជា ផងដែរ។
ជាមួយគ្នានេះ Privat នឹងក្លាយជាកីឡាករអ្នកសម្របសម្រួលយ៉ាងសំខាន់ ដល់ Emmanuel Mbarga និង Privat ដើម្បីឱ្យខ្សែបម្រើចំណូលថ្មីម្នាក់នេះ យល់ដឹងពីស្ថានភាពទូទៅនៅក្នុងក្រុមស្វាយរៀង ព្រមទាំងរបៀបរបបរស់នៅ ក្នុងប្រទេសកម្ពុជា ផងដែរ មុនពេលជនជាតិកាមេរូន ទាំង២នេះ ចាប់ដៃគ្នាជាមួយមិត្តរួមក្រុម ប្រកួតប្រជែង ជាមួយក្រុមផ្សេងៗទៀត នៅលីគកំពូលកម្ពុជា ឆ្នាំ២០២១៕
