ខ្សែកាពារលំដាប់ជួរមុខរបស់ក្រុមបឹងកេត ទេស សម្បត្តិ បានសម្រេចចាកចេញពីទ្រនំចាស់ ដែលរូបគេបានរួមរស់អស់រយ:ពេល៣ឆ្នាំនេះហើយ ដើម្បីទៅចូលរួមជាមួយក្លិបអ្នកមានទ្រព្យ វិសាខា ហើយខ្សែការពារកណ្តាលវ័យក្មេងកំពុងមានទម្រង់លេងលេចធ្លោម្នាក់ទៀតរបស់ក្លិបខេត្តព្រៃវែង ក៏បានផ្ទេរមកកាន់ វិសាខា ផងដែរ។
ក្លិបវវិសាខា បានប្រកាសស្វាគមន៍ និងចុះកុងត្រាជាមួយ ទេស សម្បត្តិ កាលពីយប់ម៉ោង៧ ថ្ងៃចន្ទ ម្សិលមិញ គឺតែប៉ុន្មានម៉ោង បន្ទាប់ពីក្លិបបឹងកេត បានប្រកាសពីការផ្ទេរ ខ្សែការពារជាប្រធានក្រុម ទេស សម្បត្តិ ទៅកាន់ក្លិបថ្មី ហើយការប្រកួត ដែលបានធ្វើឡើងក្នុងកំលុងម៉ោង៤រសៀល ថ្ងៃចន្ទនោះ បានធ្វើអ្នកស្នេហាវិស័យកីឡាបាល់ទាត់ នៅកម្ពុជា មានការចាប់អារម្មណ៍ខ្លាំង។
នៅក្រោយការប្រកាសផ្ទេរ ទេស សម្បត្តិ ទៅកាន់ក្លិបថ្មី ខ្សែប្រយុទ្ធឆ្នើម ដែលចាប់ផ្តើមបង្ហាញទម្រង់លេងលេចធ្លោឡើងវិញ ចាន់ វឌ្ឍនាកា ដែលជារៀមច្បងរបស់ ទេស សម្បត្តិ ក៏មានចិត្តអាឡោះអាល័យ សម្រាប់ការចាកចេញរបស់ប្អូនប្រុសម្នាក់នេះផងដែរ ប៉ុន្តែ វឌ្ឍនាកា បានគោរពតាមការសម្រេចចិត្តនេះ។
ម្ចាស់អាវលេខ១១ ចាន់ វឌ្ឍនាកា បានសរសេរអមដោយរូបភាព ពេលហ្វឹកហាត់ជាមួយ ទេស សម្បត្តិ ថា៖ «បាល់ទាត់ គឺបែបនេះ ថ្ងៃណាមួយ យើងនឹងប្រឈមមុខជាមួយគ្នា។ ពួកយើង គោរពនៅការសម្រេចចិត្តរបស់ប្អូន ប្អូនធំហើយ ប្អូនត្រូវរៀនពីជីវិតថ្មីមួយទៀត បទពិសោធថ្មី មិត្តរួមក្រុមថ្មី អ្វីៗនឹងថ្មី សម្រាប់ប្អូន តែបងនៅតែជូនពរប្អូនជោគជ័យលើវិថីបាល់ទាត់មួយនេះ Tes Sambath»។
ជាមួយគ្នានេះ ទេស សម្បត្តិ ក៏បានបង្ហាញការនឹកគុណដល់គ្រប់គ្នា នៅក្លិបបឹងកេត ផងដែរ សម្រាប់ការសម្រេចចាកចេញរបស់គេ នៅពេលនេះ ជាពិសេសលោកស្រី ពុធ ធីតា ដែលជាប្រធានក្លិបបឹងកេត ព្រមទាំងរៀមច្បង និងមិត្តរួមក្លិបទាំងអស់។«ខ្ញុំសូមអរគុណដល់ថ្នាក់ដឹកនាំបឹងកេត ទាំងអស់ ដែលបានមើលថែខ្ញុំអស់រយៈពេលជិត៣ឆ្នាំនេះ I love Boeungket FC and BK12»។
គួរបញ្ជាក់ថា ទេស សម្បត្តិ ជាកីឡាករយ៉ាងសំខាន់ ដែលបានជួយឱ្យក្លិបបឹងកេត ឈ្នះបានតំណែងជើងឯក ការប្រកួតលីគកំពូលកម្ពុជា ឆ្នាំ២០២០ និងឈ្នះពានរង្វាន់សម្តេច ហ៊ុន សែន ឆ្នាំ២០១៩ ហើយគេក៏ជាខ្សែការពារដ៏រឹងមាំរបស់ក្រុមជម្រើសជាតិកម្ពុជា ផងដែរ។
ជាមួយគ្នានេះ ក្លិបវិសាខា ក៏បាននាំយកខ្សែការពារកណ្តាលវ័យក្មេង ញឹម លីហួរ ពីក្រុមខេត្តព្រៃវែង មកពង្រឹងតំបន់ការពាររបស់ខ្លួនផងដែរ បន្ទាប់ពីក្លិបនេះ បានផ្ទេរខ្សែការពារ ងយ ស្រ៊ីន ទៅកាន់ក្លិបខេត្តព្រៃវែង។ ប៉ុន្តែការដោះដូរ លក្ខណៈខ្ចីជើងនេះ វាគ្មានអ្វីចម្លែកទេ ព្រោះ វិសាខា និងខេត្តព្រៃវែង ជាក្លិបជ្រកក្រោមឆត្រតែមួយ ដែលមានលោក ស សុខា និងភរិយា គឺលោកស្រី កែ សួនសុភី ជាថ្នាក់ដឹកនាំ៕
