បរទេស៖ FIFA ដែលជាអង្គភាពគ្រប់គ្រងកីឡាបាល់ទាត់ពិភពលោក នឹងទទួលបានប្រាក់ច្រើនជាង២០១លានដុល្លារអាមេរិក ដែលជាមូលនិធិបានមកពីការពិន័យ អំឡុងពេលនៃការស៊ើបអង្កេតពីបញ្ហាពុករលួយជាសកល។ នេះបើយោងទៅតាមការបញ្ជាក់របស់នាយកដ្ឋានយុត្តិធម៌របស់សហរដ្ឋអាមេរិក (DOJ) កាលពីថ្ងៃអង្គារ។
ចាប់តាំងពីអង្គភាព DOJ បានប្រកាសពីការស៊ើបអង្កេតលើករណីពុករលួយ ក្នុងឆ្នាំ២០១៥ ចុងចោទច្រើនជាង៥០នាក់ ត្រូវបានចោទប្រកាន់ពីបទឧក្រិដ្ឋកម្ម។ មនុស្សចំនួន២៧នាក់ និងក្រុមហ៊ុនសាជីវកម្មចំនួន៤ បានសារភាពថា មានកំហុស ហើយមនុស្សចំនួន២នាក់ ត្រូវបានកាត់ទោសនៅក្នុងតុលាការ។ លោក Jacquelyn M Kasulis មេធាវីបណ្តោះអាសន្នអាមេរិក សម្រាប់ស្រុកភាគខាងកើតក្នុងទីក្រុងញ៉ូវយ៉ក បានឲ្យដឹងក្នុងសេចក្តីថ្លែងការណ៍មួយថា៖ «សេចក្តីប្រកាសនៅថ្ងៃនេះបញ្ជាក់ថា សាច់ប្រាក់ដែលត្រូវបានលួចដោយមន្ត្រីកីឡាបាល់ទាត់ដែលពុករលួយ និងការប្រតិបត្តិទីផ្សារក្នុងកីឡា តាមរយៈការបន្លំ និងស៊ីសំណូក នឹងត្រូវបង្វែរឲ្យទៅកាន់ដើមវិញ ហើយនិងត្រូវប្រើប្រាស់ដើម្បីអត្ថប្រយោជន៍ក្នុងកីឡានេះ»។
អង្គភាព DOJ បានបញ្ជាក់ថា ទឹកប្រាក់ពិន័យចំនួន៣២,៣លានដុល្លារអាមេរិក ត្រូវបានអនុម័តជាបឋមដើម្បីបែងចែកទៅឲ្យ FIFA សហព័ន្ធកីឡាបាល់ទាត់ប្រចាំតំបន់អាមេរិកខាងជើង និងកណ្តាល CONCACAF សហព័ន្ធកីឡាបាល់ទាត់អាមេរិកខាងត្បូង CONMEBOL និងសហព័ន្ធកីឡាបាល់ទាត់ជាតិប្រចាំទ្វីបជាច្រើនទៀត៕
ប្រភពព័ត៌មាន៖ Channel News Asia
