បរទេស៖ ខ្សែប្រយុទ្ធ Cristiano Ronaldo បានក្លាយជាអ្នករកបានគ្រាប់បាល់ច្រើនជាងគេគ្រប់ពេលទាំងអស់ ក្នុងកីឡាបាល់ទាត់ផ្នែកបុរសអន្តរជាតិ ក្រោយពីបានស៊ុតបាល់បញ្ចូលទី២គ្រាប់ ខណៈដែលក្រុមបាល់ទាត់ជម្រើសជាតិព័រទុយហ្គាល់បានផ្តួលក្រុមជម្រើសជាតិសាធារណរដ្ឋអៀរឡង់ ក្នុងលទ្ធផល ២-១ ស្របពេលដែលក្រុមម្ចាស់ការពារជើងឯកបារាំង បានបញ្ចប់ត្រឹមលទ្ធផលស្មើ ១-១ ជាមួយនឹងក្រុមជម្រើសជាតិបូស្នី ក្នុងការប្រកួតជម្រុះ World Cup ឆ្នាំ២០២២ កាលពីថ្ងៃពុធ។
រយៈពេល១ថ្ងៃ ក្រោយពីបានបំពេញការវិលត្រឡប់របស់គេទៅកាន់ក្លិប Manchester United ខ្សែប្រយុទ្ធជើងចាស់ Ronaldo បានស៊ុតបាល់ប៉េណាល់ទីមិនចូលទី ក្រោយពីអ្នកចាំទីវ័យក្មេង Gavin Bazunu បានសង្គ្រោះបាល់យ៉ាងល្អក្នុងទីក្រុង Faro នៅមុនពេលអៀរឡង់ បានតែតរកគ្រាប់បាល់នាំមុខមុននៅជិតបញ្ចប់តង់ទី១។ ការតែតបាល់យ៉ាងល្អរបស់ John Egan បានជួយឲ្យក្រុមរបស់លោក Stephen Kenny ស្ថិតលើផ្លូវក្នុងការដណ្តើមបានជ័យជម្នះយ៉ាងកក់ក្តៅ ប៉ុន្តែ Ronaldo បានផ្តល់ការខកចិត្តដល់អៀរឡង់ តាមរយៈការរកគ្រាប់បាល់តាមស្មើនៅនាទី ទី៨៩ ខណៈដែលគ្រាប់បាល់នេះ បានជួយឲ្យគេឡើងឈរពីលើខ្សែប្រយុទ្ធអ៊ីរ៉ង់ Ali Daei លើតារាងអ្នករកគ្រាប់បាល់បានច្រើនជាងតាមរយៈការរកបាន១១០គ្រាប់។
បន្ទាប់មក Ronaldo វ័យ៣៦ឆ្នាំ បានជួយឲ្យព័រទុយហ្គាល់រកបាន៣ពិន្ទុពេញ នៅនាទី៦នៃនាទីបន្ថែម តាមរយៈការលោតតែតបាល់យ៉ាងល្អ ពីការបញ្ជូនបាល់ឆ្លងរបស់ Joao Mario។ បច្ចុប្បន្ន ព័រទុយហ្គាល់កំពុងតែនាំមុខលើក្នុងពូល A ដោយមាន១០ពិន្ទុពីការប្រកួត៤លើក៕
ប្រភពព័ត៌មាន៖ Channel News Asia
