បរទេស៖ សហព័ន្ធកីឡាបាល់ទាត់អន្តរជាតិហៅកាត់ថា FIFA កំពុងតែស៊ើបអង្កេតលើការផ្អាកការប្រកួតជម្រុះ World Cup រវាងក្រុមបាល់ទាត់ជម្រើសជាតិប្រេស៊ីល និងអាហ្សង់ទីន ខណៈដែលប្រធានអង្គភាពនេះលោក Gianni Infantino បានចាត់ទុកសកម្មភាពផ្អាកនេះ «គឺជាទង្វើដ៏ឆ្កួតលេលា» ស្របពេលដែលក្លិប Tottenham Hotspur បញ្ជាក់ថា ពួកគេត្រៀមរួចរាល់ហើយក្នុងការចាត់វិធានការផ្នែកច្បាប់ប្រឆាំងនឹងកីឡាករអាហ្សង់ទីនរបស់ខ្លួន។
អាជ្ញាធរសុខាភិបាលប្រេស៊ីល បានចូលបង្អាក់ការប្រកួតកាលពីថ្ងៃអាទិត្យ ក្រោយពីបានចោទប្រកាន់កីឡាករ៤នាក់ដែលលេងឲ្យក្របខ័ណ្ឌ Premier League ក្នុងក្រុមជម្រើសជាតិអាហ្សង់ទីន ពីបទប្រព្រឹត្តល្មើសនឹងច្បាប់ធ្វើចត្តាឡីស័កកូវីដ ១៩ របស់ប្រទេសនេះ។ អ្នកចាំទី Emiliano Martinez របស់ក្លិប Aston Villa និងកីឡាករ២នាក់របស់ Spurs គឺ Cristian Romero និង Giovani Lo Celso កំពុងតែស្ថិតនៅលើទីលាន Neo Quimica Arena ក្នុងក្រុមជម្រើសជាតិអាហ្សង់ទីន នៅពេលនោះមន្ត្រីជាច្រើនមកពីនិយ័តករសុខាភិបាលប្រេស៊ីល Anvisa បានដើរចូលទៅកាន់ទីលានប្រកួត និងបានបញ្ឈប់ការប្រកួតភ្លាមៗ ក្រោយពីទើបតែលេងបាន៥នាទី។ ខ្សែបម្រើ Emiliano Buendia របស់ក្លិប Aston Villa ក៏បានធ្វើដំណើរមកពីចក្រភពអង់គ្លេសផងដែរ និងបានស្ថិតជាកីឡាករបម្រុង។
អង្គភាព Anvisa បានបញ្ជាក់ថា ច្បាប់របស់ប្រេស៊ីល បញ្ជាក់យ៉ាងច្បាស់ថា អ្នកដំណើរដែលមកពីចក្រភពអង់គ្លេស អាហ្វ្រិកខាងត្បូង ឬឥណ្ឌា ត្រូវធ្វើចត្តាឡីស័ក១៤ថ្ងៃពេលមកដល់ និងមិនត្រូវបានអនុញ្ញាតឲ្យចូលក្នុងប្រទេសនេះឡើយ លុះត្រាតែពួកគេជាប្រជាជនប្រេស៊ីល ឬមានទីលំនៅអចិន្ត្រៃយ៍៕
ប្រភពព័ត៌មាន៖ Channel News Asia
