ក្រសួងអប់រំ យុវជន និងកីឡា បានចេញសេចក្តីណែនាំ ទៅដល់គ្រឹះស្ថាន និងស្ថាប័នពាក់ព័ន្ធ ឱ្យរៀបចំផ្តល់អាទិភាពខ្ពស់ និងបង្កភាពងាយស្រួល ទៅដល់ក្រុមអត្តពលិកជម្រើសជាតិ ដែលជាសិស្សនិស្សិត ទាំងកំពុងសិក្សា នៅថ្នាក់មធ្យមសិក្សា និងឧត្តមសិក្សា សាធារណៈ និងឯកជន ក្នុងគោលបំណងឱ្យពួកគេ មានពេលវេលាគ្រប់គ្រាន់ ក្នុងការហ្វឹកហាត់ បំពាក់បំប៉នកម្លាំង និងបច្ចេកទេស ដើម្បីត្រៀមឆ្ពោះទៅប្រជែងយកមេដាយជូនជាតិ នៅក្នុងការប្រកួតស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ គឺនៅពេលកម្ពុជា ធ្វើជាម្ចាស់ផ្ទះ ជាប្រវត្តិសាស្រ្ត។
សម្រាប់ការរៀបចំផ្តល់អាទិភាពសិស្ស និស្សិត ដែលជាកីឡាករ កីឡាការិនីជម្រើសជាតិ កំពុងហាត់ហ្វឹកហ្វឺនក្នុង និងក្រៅប្រទេស ត្រៀមលក្ខណៈរៀបចំឆ្ពោះទៅស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣នេះ ក្រសួងអប់រំ បានណែនាំឱ្យ គ្រឹះស្ថានមធ្យម និងឧត្តមសិក្សាសាធារណៈ និងឯកជន ត្រូវបានអនុញ្ញាតឱ្យធ្វើស្វ័យសិក្សា តាមអនឡាញនៅជំរំប្រមូលផ្តុំ ដោយមិនបាច់ មានវត្តមាន នៅតាមគ្រឹះស្ថានសិក្សា ហើយ ត្រូវផ្តល់ឯកសារសិក្សាជា Hard និង Soft Copies ដោយឥតគិតថ្លៃ ដល់អត្តពលិក សម្រាប់សិក្សា នៅពេលទំនេរ ពីការហ្វឹកហាត់។
បន្ថែមលើនេះ ត្រូវសម្របសម្រួលការបង្រៀន ការរៀន និងពិន្ទុសម្រាប់ត្រីមាស ឆមាស និងប្រចាំឆ្នាំ ហើយត្រូវសហការសម្របសម្រួលដល់កីឡាករ កីឡាការិនី បានប្រឡងជាប់ជាស្ថាពរ សម្រាប់ឆ្នាំសិក្សាឆ្នាំ២០២០-២០២១ ដល់ឆ្នាំ២០២២-២០២៣។ ដោយឡែក ក្រុមអត្តពលិក ដែលហាត់នៅក្រៅប្រទេស ត្រូវបានជាប់ដោយស្វ័យប្រវត្តិ។
ចំណែកនាយកដ្ឋានមធ្យមសិក្សាចំណេះដឹងទូទៅ និងស្ថាប័នពាក់ព័ន្ធ សូមសហការផ្តល់អាទិភាពដល់កីឡាករ កីឡាការិនី ក្នុងការប្រឡងយកពិន្ទុប្រចាំខែ ត្រីមាស និងឆមាស ហើយគ្រឹះស្ថាននីមួយៗ ត្រូវរៀបចំឱ្យមានការរៀន និងបង្រៀនបន្ថែមម៉ោងដល់កីឡាករ កីឡាការិនី ទៅតាមចំនួនមុខវិជ្ជា និងកម្រិតថ្នាក់ ដែលកីឡាករ កីឡាការិនី មិនបានចូលរៀន តាមអនឡាញ នៅថ្ងៃសុក្រ និងថ្ងៃសៅរ៍។
ដោយឡែក ការដាក់ពាក្យប្រឡង និងការប្រឡងថ្នាក់ជាតិ ចំពោះសិស្ស ដែលជាកីឡាករ កីឡាការិនី ក្រសួងអប់រំ នឹងផ្តល់គោលការណ៍អាទិភាពចំពោះ សិស្សថ្នាក់ទី១២ ទាំងអ្នកហាត់ នៅក្នុងស្រុក ហាត់នៅក្រៅប្រទេស និងអ្នកដណ្តើមបានមេដាយមាស ប្រាក់ និងសំរឹទ្ធ ពីស៊ីហ្គេម អាស៊ានហ្គេម។
អ្វីដែលកាន់តែពិសេសនោះ អ្នកដែលដណ្តើមបានមេដាយមាសពីស៊ីហ្គេម នឹងត្រូវឱ្យជាប់ជាស្វ័យប្រវត្តិ បើសិនជាអ្នកនោះ ចង់បន្តវិជ្ជាជីវៈជាគ្រូអប់រំ និងកីឡា ដោយក្រសួងអប់រំ បានបញ្ជាក់ថា៖ «ចំពោះសិស្សថ្នាក់ទី១២ ដែលជាអត្តពលិកជម្រើសជាតិ ទទួលបានមេដាយមាសស៊ីហ្គេម ទទួលបានអាទិភាពជាប់ជាស្វ័យប្រវត្តិ បើមានបំណងចង់បន្តវិជ្ជាជីវៈជាគ្រូអប់រំកាយ និងកីឡា ហើយបានដាក់ពាក្យប្រឡង និងបានប្រឡងចូលគ្រូអប់រំកាយ កម្រិតមូលដ្ឋាន ឬគ្រូអប់រំកាយកម្រិតបរិបត្រ»៕