បរទេស៖ កីឡាករ Tyson Fury បានការពារខ្សែក្រវាត់ WBC ទម្ងន់ធ្ងន់យ៉ាងជោគជ័យរបស់ខ្លួន កាលពីថ្ងៃសៅរ៍ នៅពេលដែលរូបគេបានផ្តួលកីឡាករ Deontay Wilder ឲ្យដួលនៅលើសង្វៀនប្រកួតជាលើកទី៣ ក្រោយពីបានវាយកណ្តាប់ដៃស្តាំដ៏ខ្លាំងរបស់គេ ទៅលើក្បាល នៅទឹកទី១១ នាសង្រៀន T-Mobile Arena នៅទីក្រុង Las Vegas។
ការប្រកួតនេះពិតជាមានភាពស្វិតស្វាញ និងទាក់ទាញហួសជាងការរំពឹងទុកទៅទៀត ប៉ុន្តែ នៅតែបញ្ចប់ក្នុងលទ្ធផលដូចការរំពឹងទុក ខណៈដែលកីឡាករអង់គ្លេស បានផ្តួលជើងខ្លាំងរបស់អាមេរិក ដើម្បីស្ថិតជាម្ចាស់ជើងឯកដែលមិនស្គាល់ចាញ់សោះ។ ក្រោយពីបានបាត់បង់ខ្សែក្រវាត់ WBC ក្រោមស្នាដៃ Fury កាលពី២០ខេមុន ក្នុងជំនួបជាលើកដំបូង កីឡាករ Wilder បានបង្ហាញពីការស្រេកឃ្លានជ័យជម្នះនោដើមទឹក តាមរយៈការប្រើកណ្តាប់ដៃវាយយ៉ាងសន្ធាប់ទៅលើ Fury ខណៈដែលរូបគេក៏បានដណ្តើមយកឱកាសដើម្បីវាយកណ្តាប់ដៃស្តាំដ៏ខ្លាំងរបស់គេផងដែរ។ Fury បានវាយបកវិញ និងបានវាយឲ្យ Wilder ដួលនៅសង្វៀនប្រកួត នៅទឹកទី៣ ជាមួយនឹងការវាយចំគោលដៅយ៉ាងល្អរបស់គេ ប៉ុន្តែ កីឡាករអាមេរិក Wilder បានវាយឲ្យដៃគូរបស់ខ្លួនដួលចំនួន២លើកវិញនៅទឹកទី៤ ជាមួយនឹងការប្រើកណ្តាប់ដៃវាយចំក្បាល។
ប៉ុន្តែ ចាប់ពីតាំងពីទឹកនោះមក Fury បានគ្រប់គ្រងស្ថានភាពយ៉ាងល្អ និងមានប្រៀបលើ Wilder ក្រោយពីបានបាយឲ្យរូបគេដួលម្តងទៀតនៅទឹកទី១០ នៅមុនពេលបញ្ចប់ការប្រកួត តាមរយៈការវាយកណ្តាប់ដៃស្តាំចំគោលដៅយ៉ាងល្អ ដើម្បីឲ្យ Wilder ដួលជាលើកទី៣នៅលើសង្វៀន និងដើម្បីដណ្តើមយកជ័យជម្នះតែម្តង៕
ប្រភពព័ត៌មាន៖ Channel News Asia
