បរទេស៖ ក្រុមឥន្ទ្រីដែក អាល្លឺម៉ង់ បានក្លាយជាក្រុមដំបូងគេរបស់អឺរ៉ុប ក្នុងការឈ្នះសិទ្ធិទៅលេងក្នុងព្រឹត្តិការណ៍ World Cup ឆ្នាំ២០២២ តាមរយៈការផ្តួលក្រុមជម្រើសជាតិម៉ាសេដ្វានខាងជើង ក្នុងលទ្ធផល ៤-០ កាលពីថ្ងៃចន្ទ ដើម្បីមានសុវត្ថិភាពក្នុងការបញ្ចប់ដោយការឈរលើកំពូលតារាងនៃពូល J ខណៈដែលនៅសល់២ប្រកួតទៀត។
គ្រាប់បាល់ស៊ុតបញ្ចូលទី២គ្រាប់នៅតង់ទី២ពីខ្សែប្រយុទ្ធ Timo Werner និង១គ្រាប់ពី Kai Havertz និង Jamal Musiala បានជួយឲ្យក្រុមបាល់ទាត់ជម្រើសជាតិអាល្លឺម៉ង់ កត់ត្រាជ័យជម្នះជាលើកទី៥ ក្នុងចំណោមការប្រកួតទាំង៥លើក ក្រោមការដឹកនាំរបស់គ្រូបង្វឹកថ្មីលោក Hansi Flick និងបានជួយឲ្យពួកគេមាន២១ពិន្ទុ ខណៈដែលក្រុមជម្រើសជាតិរ៉ូម៉ានី កំពុងតែឈរលេខ២ ដោយមាន១៣ពិន្ទុ។ រាល់ក្រុមដែលបញ្ចប់ដោយការឈរលេខ១ក្នុងពូលទាំងអស់ នឹងឈ្នះកៅអីជាស្វ័យប្រវត្តិ ដើម្បីចូលរួមក្នុងយុទ្ធនាការនៅប្រទេសកាតា។
លោក Flick ដែលបានចូលជំនួសកន្លែងរបស់លោក Joachim Loew កាលពីដើមឆ្នាំនេះ បានឲ្យដឹងថា៖ «ផ្អែកលើលទ្ធផលនេះ វាពិតជាលទ្ធផលដ៏ល្អឥតខ្ចោះ។ យើងបានទទួលរបស់ដែលយើងចង់បាន បានឈ្នះសិទ្ធិយ៉ាងឆាប់រហ័សតាមដែលអាច ហើយបច្ចុប្បន្ន យើងបានឈ្នះការប្រកួត៥លើកជាប់ៗគ្នា»៕
ប្រភពព័ត៌មាន៖ Channel News Asia
