ក្រុមបាល់ទះ វិសាខា និងក្រសួងមហាផ្ទៃ បានបញ្ចប់ការប្រកួតវគ្គជម្រុះតាមពូល នៃពានរង្វាន់បាល់ទះ Special Volleyball Challenge 2021 ជាមួយការឈ្នះគ្រប់ការប្រកួតដូចគ្នា មុនពេលក្រុមទាំង២ បានឈានទៅកាន់ការប្រកួតវគ្គពាក់កណ្តាលផ្តាច់ព្រ័ត្រ ដែលនឹងត្រូវធ្វើ នៅថ្ងៃទី១៣ ខែតុលា ឆ្នាំ២០២១នេះ។
តាមរយៈការប្រកួតវគ្គជម្រុះតាមពូល ដែលត្រូវបានធ្វើឡើង តាំងពីថ្ងៃទី២៤ ខែកញ្ញា ហើយទើបបានបញ្ចប់ កាលពីថ្ងៃទី១០ ខែតុលា ឆ្នាំ២០២១នេះ ក្រុមវិសាខា ដែរឈរនៅពូលA A នោះ បានយកឈ្នះលើក្រុម S&E Cambodia ក្រុមកោះដាច់ ក្រុមកងពលអន្តរាគមន៍លេខ៣ ក្រុមស្នងការដ្ឋាននគរបាលរាជធានីភ្នំពេញ និងក្រុម PS Concrete ជាមួយលទ្ធផល ២សិតដាច់ (២-០) ដូចគ្នា ដើម្បីឈរនៅចំណាត់ថ្នាក់លេខ១ មាន១៥ពិន្ទុពេញ។
ចំណែកក្រុម PS Concrete ទទួលបានចំណាត់ថ្នាក់លេខ២ ប្រចាំពូលនេះ ដើម្បីឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រដែរ ដោយឈ្នះ ២-០ ចំនួន២ប្រកួត ឈ្នះដោយ ២-១ ចំនួន១ប្រកួត ហើយបានចាញ់ ២-០ ចំនួន១ប្រកួត និងចាញ់ ២-១ ចំនួន១ប្រកួត ធ្វើឱ្យពួកគេ មាន៩ពិន្ទុ ព្រោះតាមលក្ខខណ្ឌនៃការប្រកួតនេះ គឺឈ្នះ ២-០ បាន៣ពិន្ទុពេញ រីឯឈ្នះ ២-១ គឺក្រុមឈ្នះបាន២ពិន្ទុ និងក្រុមចាញ់បាន១ពិន្ទុ។
ដោយឡែក សម្រាប់ការប្រកួតជម្រុះប្រចាំពូលB វិញ ដែលមានត្រឹម៥ក្រុមនោះ គឺក្រុមក្រសួងមហាផ្ទៃ បានយកឈ្នះក្រុមគង់នៅវត្តប្រាសាទ ក្រុមយុវជនស្រុកល្វាឯម ក្រុមអធិរាជប្រអប់ និងក្រុមយុវជនខេត្តបន្ទាយមានជ័យ ដោយលទ្ធផល ២-០ ដូចគ្នា ដើម្បីទទួលបានលេខ១ ជាមួយការមាន១២ពិន្ទុពេញ ចំណែកក្រុមអធិរាជប្រអប់ បានលេខ២ ជាមួយការឈ្នះ៣ដង និងចាញ់១ដង មាន៨ពិន្ទុ។
យោងតាមលទ្ធផលនេះ ក្រុមវិសាខា នឹងត្រូវប្រកួតវគ្គពាក់កណ្តាលផ្តាច់ព្រ័ត្រ ជាមួយក្រុមអធិរាជប្រអប់ នៅទីលានបាល់ទះកីឡដ្ឋានព្រីនស៍ នារសៀលម៉ោង ២ ថ្ងៃពុធស្អែកនេះ ហើយក្រុមក្រសួងមហាផ្ទៃ ត្រូវប្រកួតជាមួយក្រុម PS Concrete នៅរសៀលម៉ោង ៣:៣០ ក្នុងថ្ងៃជាមួយគ្នានោះដែរ ដើម្បីស្វែងរកក្រុមឈ្នះ ឡើងទៅជួបគ្នា នៅវគ្គផ្តាច់ព្រ័ត្រ ដែលគ្រោងធ្វើនៅថ្ងៃទី១៧ ខែតុលា ខាងមុខនេះ៕
