ការប្រកួតពានរង្វាន់សម្តេច ហ៊ុន សែន ថ្នាក់ខេត្ត ប្រចាំឆ្នាំ២០២១ បានរកឃើញបេក្ខភាពជាក្រុមខ្លាំង ទាំង៤ ដើម្បីឡើងទៅប្រកួតនៅវគ្គពាក់កណ្តាលផ្តាច់ព្រ័ត្រ ជាផ្លូវការហើយ បន្ទាប់ពីការប្រកួតវគ្គជម្រុះ៨ក្រុមចុងក្រោយ បានបញ្ចប់ កាលពីថ្ងៃសៅរ៍ និងថ្ងៃអាទិត្យ ម្សិលមិញ។
តាមរយៈការប្រកួតជម្រុះ៨ក្រុមចុងក្រោយនោះ ក្រុមខេត្តត្បូងឃ្មុំ, ខេត្តបាត់ដំបង, ខេត្តបន្ទាយមានជ័យ និងកោះកុងអេហ្វស៊ី សុទ្ធតែបានកត់ត្រាជ័យជម្នះដ៏មានន័យ នៅក្នុងការប្រកួត ដោយភាពប្រយ័ត្នប្រយែង ជាមួយវិធានការពារនៃជំងឺកូវីដ១៩ ដើម្បីឡើងទៅជួបគ្នា នៅវគ្គ១/២ផ្តាច់ព្រ័ត្រ។
សម្រាប់ ការប្រកួត ចំនួន២គូ ដែលត្រូវបានធ្វើឡើង កាលពីថ្ងៃសៅរ៍ ក្រុម ស.ស.យ.ក ខេត្តបាត់ដំបង បានទម្លាក់ក្រុមខេត្តកណ្ដាល ជាមួយការយកឈ្នះរហូតដល់ ៧-១ នៅកីឡដ្ឋាន 7NG ចំណែកក្រុមខេត្តត្បូងឃ្មុំ បានយកឈ្នះភ្នំពេញហ្គាឡាក់ស៊ី ២-០ នៅលើ វាលស្មៅ AEU Sport Park។
យ៉ាងណាមិញ សម្រាប់២ប្រកួត ដែលបានធ្វើ នៅថ្ងៃអាទិត្យ ក្រុមខេត្តកោះកុងអេហ្វស៊ី បានលត់ក្រុមក្រុមខេត្តកំពង់ឆ្នាំង រហូតដល់ ៩-១ នៅទីលានកីឡដ្ឋានកងយោធពលខេមរភូមិន្ទ រីឯក្រុមខេត្តបន្ទាយមានជ័យ បានយកឈ្នះក្រុមសៀមរាបអេហ្វស៊ី ត្រឹម ១-០ ទាំងលំបាក នៅកីឡដ្ឋានខេមបូឌាអ៊ែរវ៉េ ដើម្បីឡើងទៅកាន់វគ្គបន្ត។
ដោយឡែក សម្រាប់ការប្រកួតវគ្គពាក់កណ្ដាលផ្ដាច់ព្រ័ត្រ នឹងចាប់ផ្ដើមនៅថ្ងៃពុធ ទី២០ ខែតុលា ដោយក្នុងនោះ ក្រុមត្បូងឃ្មុំ ត្រូវជួបជាមួយក្រុម ស.ស.យ.ក ខេត្តបាត់ដំបង ហើយក្រុមខេត្តបន្ទាយមានជ័យ ត្រូវប្រឈមជាមួយ ក្រុមកោះកុងអេហ្វស៊ី នៅថ្ងៃព្រហស្បតិ៍ ទី២១ ខែតុលា៕